«Қорғас» шекара маңы ынтымақтастық халықаралық орталығы аумағында шекаралық кеңістіктегі режимдерді бұзудың алдын алу және азаматтарға белгіленген ережелерді түсіндіру жұмыстары жүргізілді.
Қазіргі таңда ШЫХО аумағында белгіленген режим талаптарын және Қазақстан Республикасының мемлекеттік шекарасын бұзу, тыйым салынған заттар мен бұйымдарды (жануар тектес өнімдер, қосарланған мақсаттағы тауарлар және т.б.) заңсыз алып өту әрекеттері орын алуда.
Қазақстан мен Қытай арасындағы шекара маңы ынтымақтастығының халықаралық орталығы «Қорғас» ШЫХО-да күн сайын мыңдаған азамат сауда жасауға, іскерлік келісімдер жүргізуге және сауда павильондарын аралауға келеді.
Ерекше режимдік аймақ кәсіпкерлік субъектілері мен азаматтар арасындағы сауда-экономикалық өзара іс-қимыл мен тауар алмасуға арналған. Орталық аумағындағы Қазақстан павильондарынан Қытай жағындағы павильондарға дейін ғана еркін қозғалуға рұқсат етіледі. Бұл аймақ мемлекеттік шекараны кесіп өтуге арналған өткізу пункті емес. Оның аумағынан Қытайдың ішкі бөлігіне шығуға қатаң тыйым салынады.
ҚР ҰҚК ШҚ Жетісу облысы бойынша департаменті «Қорғас» шекаралық бақылау басқармасы бастығының міндетін атқарушы, подполковник Нұртас Ерғазиев:
– Өкінішке қарай, азаматтардың тәртіпті білмей, ШЫХО аймағынан заңсыз шығуға тырысуы жиі орын алады. Бұл ҚР Мемлекеттік шекарасын бұзу саналады. Мұндай әрекеттер үшін ҚР Заңнамасына сәйкес әкімшілік және қылмыстық жауапкершіліктер қарастырылған, – дейді.
Айта кетерлігі, тыйым салынған заттарды алып өту, режимдік нысандарда рұқсатсыз фото және бейне түсіру, шекара қызметі қызметкерлерінің заңды талаптарын орындамау – құқықбұзушылық. Жалпы, ШЫХО аумағына қауіпсіз барып-қайту үшін жеке куәлігіңіз немесе төлқұжатыңыз болуы, тек белгіленген маршруттар бойынша жүріп, орталықтан Қытай бағытына шығуға әрекеттенбеу керек және ҚР Шекара қызметі мен басқа да бақылау органдарының талаптарын сақтау қажет.
Бұл ережелерді сақтау құқықбұзушылықтың алдын алуға және стратегиялық маңызды нысанда тәртіпті қамтамасыз етуге көмектеседі. Шекаралық ынтымақтастықтың символы «Қорғас» ШЫХО-да белгіленген ережелерді сақтаған әрбір азамат Қазақстан мен Қытай арасындағы қауіпсіздік пен тату көршілік қарым-қатынастардың дамуына ықпал етеді.
Демек, шекара кеңістігінде белгіленген тәртіптерді сақтау – әркімнің міндеті. Қауіпсіздік әр азаматтың жауапкершілігінен басталады.
Қажет АНДАС
