Жазиралы Жаркент өңірінде «Тіл – ұлттың рухани тірегі» атты апталық аясында көптеген игілікті іс-шара жүзеге асуда.
Аудандық мәдениет, тілдерді дамыту және спорт бөлімі қызметкерлерінің ұйымдастыруымен «Мемлекеттік тіл – тәуелсіздік символы» деген тақырыпта 18 бен 35 жас аралығындағы өзге ұлт өкілдерінің арасында байқау өтті.
– Мемлекеттік тілді насихаттауда нақты іс-шаралардың тигізер ықпалы көп екенін байқадық. Біз тек апталық кезінде ғана емес, жыл бойы ұжымдарда өткізілетін мәдени шараларда оларда мәртебелі тілдің шоқтығын айдарлауға ықпал етіп келеміз. Осындай нақты қарекеттердің нәтижесінде жиындарда сөзін қазақ тілінде бастап алып, одан әрі орысша жортатындар азайды, – дейді аудандық мәдениет, тілдерді дамыту және спорт бөлімінің басшысы Толқын Көшербаева.
Тіл тағдыры – ұлт тағдыры. Қоғамдық ортада мемлекеттік тілдің қолдану аясын кеңіту, мәртебесін көтеру, жас ұрпақты ұлтымыздың тілін, әдет-ғұрпын, салт-дәстүрін құрметтеуге, сонымен қатар ана тілін өз жандүниесімен сезінуге баулу тіл сарбаздарының басты міндеті.
Аудандық Мәдениет үйінде өткен «Мемлекеттік тіл – тәуелсіздік символы» атты байқау сөзімізге жақсы мысал. Байқау шарты бойынша талапкерлер бірінші кезеңде мемлекеттік тілде бейнебаян түрінде өздерін таныстырды. Екінші кезеңде «Сөздің көркі – мақал» деген тақырыпта ұяшықтарға жасырылған мақалдардың толық нұсқасын тауып, үшінші кезеңде үміткерлер ұяшықтардан ойтүрткі сөйлемдерді таңдап, оларды жүйелеп толықтырудан жарысты.
Бұл жолы аудандық байқауға 10 талапкер қатысты. Ақыл додасы әділқазылар алқасының қадағалауымен ережеге сәйкес өтіп, қатысушылардың дайындығы да жоғары болғаны байқалды.
Көктал ауылдық округіндегі Д. Қонаев атындағы орта мектептің бастауыш сынып мұғалімі Михрай Исрайылова бәрінен оза шауып, байқаудың бас жүлдесін иеленді. I орынды Сарыбел ауылдық округінен қатысқан Шахмұрат Рахмидинов, II орынға белгіленген екі жүлдені Атамекен ауылдық округінен келген Интизар Ашимова мен Бірлік ауылдық округінің Нәдек ауылындағы қазақ отбасының ұйғыр келіні Мубарак Арзиева бөлісті. III орын жүлдесіне Үлкеншыған ауылынан қатысқан Карина Маликова мен Жаркент педагогикалық-гуманитарлық колледжінің 3-курс студенті Диляра Сетяева ортақтасты.
Байқауға қатысқандардың бәрі де бағалы сыйлықпен, аудан әкімінің Алғыс хатымен марапатталды.
Мырзағали НҰРСЕЙІТ
