«Таза Қазақстан» республикалық экологиялық акциясы – бүгінгі таңда еліміздің түкпір-түкпірінде өтіп, жалпыұлттық сипатқа ие болған маңызды бастамалардың бірі. Бұл жобаның негізгі мәні тек көше мен ауланы қоқыстан тазартумен шектелмейді, бастысы – қоғам санасында экологиялық мәдениетті қалыптастырып, табиғатқа жанашырлықпен қарауды әр азаматтың күнделікті өмір салтына айналдыру.
Қазіргі кезде тұрмыстық қалдықтардың көбеюі, бей-берекет тасталған заттар қоршаған ортаға үлкен зиян келтіріп отыр. Осы экологиялық мәселені шешуде барша қоғам болып бірлесіп әрекет ету маңызды. Науқан басталғалы бері ел көлемінде барлық азамат белсенділік танытып келеді. Өз аумақтарын, көпқабатты үйлердің аулаларын, саябақтар мен скверлерді қоқыстан тазартып қана қоймай, жаппай ағаш көшеттерін отырғызу, өзендер мен бұлақтардың, көлдердің жағалауын қоқыстан арылту жұмыстарын жүйелі түрде жүргізуде.
Бұл бастаманы өз кезегімізде біз де қолдап, сенбілікті жиі өткізіп, ғимараттың алдын тазартып, ретке келтіріп жатырмыз. Мекеме қызметкерлері, спортшыларымыз да қалыс қалған жоқ. Бұл бастама уақтыша болмаса бір белгіге бола емес – өзіміз үшін. Сондықтанда баршаңызды сенбілікке шақырамыз. Айналамызды таза ұстап, табиғатымызды күтіп-баптап қарау – біздің міндет. Тазалық бар жерде адамның көңілі жай, дені сау.
Бұл игі іс адамның туған жерге деген көзқарасын түбегейлі өзгертіп, қоршаған ортаға деген жауапкершілікті күшейте түседі. Қазақстанның ұлан-ғайыр аумағы мен бай табиғаты – болашақ ұрпаққа аманатталған баға жетпес байлық. Табиғатты ластау – өз болашағымызға балта шабумен тең, өйткені экологиялық ахуалдың нашарлауы адам денсаулығы мен өмір сапасына тікелей әсер етеді.
«Таза Қазақстан» акциясы уақытша науқан немесе бір күндік сенбілік болып қалмауы тиіс. Бұл – әр саналы азаматтың өмірлік ұстанымы болуы қажет. Табиғатты аялау – бұл ертеңгі келешек пен өскелең ұрпақтың бақытты өміріне жасалған ең үлкен әрі маңызды инвестиция.
Аман ҚАЛИЕВ
«Жетісу» волейбол клубы директорының орынбасары
