Сөзге тоқтаған елдің ұрпағы ойын ашық айтып, пікірін орнықты жеткізуді қашанда қадір тұтқан. Бүгінде сол үрдістің заманауи жалғасы – пікірсайыс алаңдары. Қала күні қарсаңында Талдықорған қаласының әкімі Ернат Бәзіл Оқушылар сарайында мектеп пікірсайысшылары және клуб жетекшілерімен жүздесіп, өскелең буынның ой-толғамына құлақ түрді.
Еркін әңгіме сипатында өткен басқосуда жас шешендер шаһардың бүгінгі тынысы мен келешек келбетіне қатысты көкейдегі сауалдарын бүкпесіз ортаға салды. Жастар бастамасы, экологиялық мәдениет, білім беру, қала тазалығы мен Талдықорғанның алдағы өрісі жөніндегі ұсыныстарын айтып, өздері көрген түйткілдің түйінін тарқатудың жолдарын сөз етті.
Жиынға қатысқан Ш. Уәлиханов атындағы №10 мектеп- гимназиясының оқушысы Аружан Жарас пікірсайыс қозғалысын одан әрі өрістетудің маңызын атап өтті.
– Балалардың қызығушылығын арттыратын түрлі жарыстар мен бастамаларға қолдау болса деймін. Білім беру бағытында пікірсайысты дамытуға мүмкіндік мол. Қаламызда отыз мектеп бар. Сол білім ошақтарының арасында пікірсайыс мәдениеті кеңінен қанат жайса, оқушылардың ой-өрісі мен сөз саптауы да шыңдала түсер еді, – дейді.
Жүздесу барысында жас буын тарапынан бірқатар ұтымды бастама ұсынылды. Соның ішінде мектептер арасында «Таза аула – таза қала» жобасын өткізу, оқушылардан құралған «Жас қала кеңесін» жасақтау, жастардың ой-пікірін жинақтайтын «Жастар идеясы» цифрлық алаңын іске қосу және «Талдықорған – 2035: менің қалам» атты идеялар байқауын ұйымдастыру жөнінде ұсыныстар айтылды.
Пікірсайысшылардың тағы бір бастамасы – «Талдықорған қаласы әкімінің кубогы» турнирін жылына 2 мәрте тұрақты өткізу. Мұндай додалар жасөспірімнің сөз саптауын шыңдап қана қоймай, қарсы тараптың уәжін тыңдау, дәлел таразылау, ортақ мәмілеге келу мәдениетін қалыптастыруға жол ашады.
Кездесуде қала әкімі Ернат Бәзіл де пікірсайыстың мән-маңызына тоқталып, жастардың ұсыныстарын қолдауға әзір екенін жеткізді.
– Пікірсайыс – ойды ашық жеткізіп, қарсы тараптың уәжін тыңдауға, мәселенің шешімін бірлесе іздеуге баулитын маңызды орта. Бүгінгі жастардың қалаға қатысты ұсыныстары біз үшін құнды. Себебі шаһардың ертеңгі тынысы сіздердің бастамаларыңызбен сабақтас. Сондықтан ойларыңызды ортаға салып қана қоймай, оны нақты іске айналдыруға талпыныңыздар. Әкімдік тарапынан мұндай жобаларды қолдауға әрдайым дайынбыз, – деді Ернат Дүйсенбекұлы.
Бүгінде Талдықорғандағы 27 мектепте 46 пікірсайыс клубы жұмыс істейді. Оның 28-і қазақ, 13-і орыс, 5-еуі ағылшын лигасына тиесілі. Өткір ой мен ұтқыр сөзді серік еткен үйірмелерге барлығы 529 оқушы қатысады.
Қашанда елдің ертеңін сөзге ұста, ойға мығым ұрпақ айқындайды. Бүгінгі пікірсайыс алаңы – сол талапты буынның ойын шыңдап, сөзін салмақтап, қоғамдық іске араласуына жол ашатын орта.
Санжар СҰЛТАНҒАЗЫ
