Күз айы бағбандар үшін жиын-теріннің қызған шағы. Күндіз ауа райы әлі де жылы болғанымен, түнгі салқын күшейіп, алғашқы үсіктің қаупі арта түседі.
Сондықтан бақшадағы жылусүйгіш дақылдарды жинауды ұзаққа созбай, уақытылы теріп алған жөн. Әсіресе, қызанақ, бұрыш, қияр, баялды сияқты бақшалық дақылдар суыққа төзімсіз келеді. Синоптиктер ауа температурасы нөлге дейін немесе одан төмендейтінін ескерткен жағдайда, пісіп тұрған өнімді алдын ала жинап алған дұрыс. Қызанақты толық қызарғанын күтпей, жасылдау кезінде де жинауға болады. Құрғақ әрі қолайлы температурадағы бөлмеде ол біртіндеп пісіп-жетіледі.
Ал бұрыш пен баялды суықтан зақымданса, тез бұзылып, сақтау сапасын жоғалтады. Жылы күндер әлі жалғасады деп өнімді бақшада ұзақ қалдыру қауіпті. Сондықтан бағбандар ауа райының болжамын бақылап, алдағы суық түндерге алдын ала дайындалғаны жөн. Егер кейбір дақылдарды жинамай қалдыру қажет болса, оларды арнайы жабын материалымен қорғауға болады. Аласа өсімдіктерді тікелей жабуға, ал бойы биік дақылдарға доға тәрізді қаңқа орнатып, үстін жабуға кеңес беріледі.
Бұл ретте жабынның өсімдікке тығыз жабысып қалмауына назар аударған жөн. Пленка да суықтан қорғауға мүмкіндік береді. Алайда оның жапырақпен тікелей жанасуы өсімдікке зиян келтіруі мүмкін. Сондықтан пленка мен өсімдік арасында ауа қабаты болғаны дұрыс. Мамандардың айтуынша, алғашқы үсікті күтпей, ауа райының өзгерісіне алдын ала қамдану – бақша өнімін сақтап қалудың ең тиімді жолдарының бірі.
Айгүл Байжұмақызы
