Жетісу облысының төрт тұрғыны TikTok желісіндегі тікелей эфирлер арқылы заңсыз карта ойындарын ұйымдастырып, 95 миллион теңге көлемінде табыс тапқан. Сот үкімімен олардың әрқайсысы төрт жылға бас бостандығынан айырылды, – деп хабарлайды 7-su.kz ақпараттық порталы.
Сотқа дейінгі тергеу барысында облыстың төрт тұрғынының TikTok платформасында тікелей эфир өткізіп, заңсыз ойын бизнесін ұйымдастырғаны анықталған. Құқықбұзушылық жасалған кезде олардың біреуі кәмелетке толмаған болған.
Тергеу мәліметінше, заңсыз әрекеттен олар 95 миллион теңге көлемінде табыс тапқан.
Сотта төртеуі де Қазақстан Республикасы Қылмыстық кодексінің 307-бабының 3-бөлігімен («Заңсыз ойын бизнесін ұйымдастыру») кінәлі деп танылды.
Сот үкімімен сотталғандардың әрқайсысына төрт жыл мерзімге бас бостандығынан айыру жазасы тағайындалып, мүлкі тәркіленді.
Үкім заңды күшіне енген жоқ.
