Moody’s халықаралық рейтинг агенттігі Қазақстанның мемлекеттік борышының төмен деңгейін, борышқа қызмет көрсету қабілетінің жоғары екенін және жинақталған валюталық активтерін елдің күшті фискалдық ұстанымының негізгі факторлары ретінде атап өтті, – деп хабарлайды 7-su.kz ақпараттық порталы.
Агенттіктің бағалауынша, бұл көрсеткіштер экономикалық саясатқа қажетті икемділік беріп, сыртқы экономикалық күйзелістердің әсерін азайтуға мүмкіндік беретін елеулі қауіпсіздік қорын қалыптастырады.
Мұнай өндіру көлемінің төмендеуіне қарамастан, Қазақстан экономикасы өсімін жалғастырып келеді. Бұған өңдеуші өнеркәсіп, құрылыс, көлік және өзге де мұнайға тәуелсіз секторлардың жалпы ішкі өнім өсіміне қосқан үлесі ықпал етуде. Сонымен қатар цифрлық, көлік және энергетикалық инфрақұрылымға бағытталған инвестициялар экономиканы әртараптандыруға және оның күрделілігін арттыруға мүмкіндік береді. Moody’s бағалауынша, орта мерзімді перспективада шикізаттық емес секторлар экономикалық өсудің негізгі драйверлері болып қала береді.
Агенттік салық реформаларының да фискалдық орнықтылықты күшейтуге ықпал ететінін атап өтті. Атап айтқанда, өзгерістер бюджеттің мұнайға қатысы жоқ кіріс базасын кеңейтуге бағытталған.
Жалпы, экономиканы одан әрі әртараптандыру, салық реформаларын іске асыру және цифрлық, көлік пен энергетикалық инфрақұрылымға инвестиция салу Қазақстанның фискалдық тұрақтылығын нығайтып, экономикалық өсім үшін жаңа мүмкіндіктер қалыптастырады.
