Ұстаздықтың салмағы тек білім берумен өлшенбейді. Әсіресе сынып жетекшісі үшін әр баланың мінезін танып, қабілетін байқап, жүрегіне жол табу, сынып ұжымын бір арнаға тоғыстыру, ата-анамен берік байланыс орнату секілді жауапкершілігі мол міндеттер қатар жүреді. Осы еңбектің кәсіби қырын саралап, үздік тәжірибелерді насихаттау мақсатында Талдықорған қаласындағы Қ. Қасымов атындағы №28 IT мектеп-лицейінде «Үздік сынып жетекші – 2026» атты облыстық байқау өтті.
Байқауға аудандық және қалалық кезеңдерден жеңімпаз атанған 10 сынып жетекшісі қатысты. Олар Ақсу, Алакөл, Ескелді, Көксу, Кербұлақ, Қаратал, Панфилов, Сарқан аудандары мен Талдықорған, Текелі қалаларының намысын қорғады.
Сайыстың басты ерекшелігі қатысушылардың сынып жетекшісі ретіндегі күнделікті еңбегін жан-жақты танытуында болды. Өйткені бүгінгі сынып жетекші тек сынып сағатын ұйымдастырып, құжат жүргізетін маман ғана емес. Ол оқушының тұлғалық қалыптасуына ықпал ететін тәлімгер, бала мен ата-ана арасындағы алтын көпір, сыныптағы өзара сыйластық пен ынтымақтың ұйытқысы.
Жарыс «Адал азамат» біртұтас тәрбие бағдарламасының құндылықтарына негізделіп, үш кезең бойынша ұйымдастырылды. Алғашқы кезеңде қатысушылар құндылықтарды күнделікті сынып өмірімен байланыстыра отырып, сынып сағатын өткізді. Бұл кезеңде «Еңбекқорлық және кәсіби біліктілік» құндылығына басымдық берілді.
«Мен – сынып жетекшімін» деп аталған екінші кезеңде ұстаздар өздерінің кәсіби ұстанымын, тәрбие жұмысындағы негізгі қағидаларын, оқушымен қарым-қатынас тәсілдерін және тәжірибесін таныстырды. Бес минуттық таныстырылым барысында әр қатысушы сынып жетекшілігін өз болмысымен сабақтастыра отырып көрсетуге мүмкіндік алды.
Ал байқаудың үшінші кезеңі «Жобалық идеялар алаңы» деп аталды. Бұл кезеңде ұстаздар нақты қажеттілікке негізделген, мектеп тәжірибесінде жүзеге асыруға болатын авторлық жобаларын қорғады. Оқушы қауіпсіздігі, ата-анамен серіктестік, кәсіби бағдар, патриоттық тәрбие, цифрлық мәдениет секілді бүгінгі мектеп өміріндегі өзекті мәселелер жобалардың негізгі өзегіне айналды.
Байқау барысында ұстаз еңбегінің тағы бір маңызды қыры өнер арқылы да көрініс тапты. №28 IT мектеп-лицейінің оқушылары мен Оқушылар сарайының шығармашылық ұжымдары ән мен биден шашу шашып, мерекелік көңіл-күй сыйлады. «Қазына» би ансамблінің «Шашу» биі, мектептің вокал тобы орындаған «Ұстазым» әні, «Солнышко» би ансамблінің «Шырайлы бойжеткені», «Унисон» вокалдық тобының «Қазақпын» әні және өзге де концерттік нөмірлер байқаудың мазмұнын өнермен сабақтастырды.
Кәсіби шеберлігін тәжірибесімен ұштастырған қатысушылар арасынан Алакөл ауданы, А. Байтұрсынов атындағы орта мектептің сынып жетекшісі Мөлдір Түсіпбекова І орынға ие болды. ІІ орынды Көксу ауданы Мұқаншы орта мектебінің сынып жетекшісі Жанар Зейнулда және Панфилов ауданы Д. Қонаев атындағы орта мектептің сынып жетекшісі Ақерке Бейсбай иеленді. ІІІ орынға Сарқан ауданы №54 орта мектебінің сынып жетекшісі Жадыра Амангелдинова мен Ақсу ауданы Ж. Сыдықов атындағы орта мектептің сынып жетекшісі Алтынай Абдықадыр лайық деп танылды. Сонымен қатар бірқатар қатысушы арнайы номинациялармен марапатталды. Қаратал ауданы Кәлпе орта мектебінің сынып жетекшісі Қуаныш Абдрахманов «Ұрпақ тәрбиесіндегі ұтымды идея», Талдықорған қаласы №22 орта мектебінің сынып жетекшісі Әсем Бегімбетова «Ата-анамен ынтымағы жарасқан» номинацияларын иеленді. Ескелді ауданы Ш. Уәлиханов атындағы орта мектеп-гимназиясының сынып жетекшісі Әйгерім Өкенова «Бала жүрегіне жол тапқан ұстаз», Текелі қаласы №8 орта мектебінің сынып жетекшісі Айзат Мұқаш «Сынып бірлігін үйлестірген көшбасшы», ал Кербұлақ ауданы Қоғалы орта мектебінің сынып жетекшісі Гүлнар Ақылбекова «Тұлға қалыптастырудағы шығармашыл жетекші» номинацияларымен марапатталды.
Медет ЖҰМАБАЙ
