Волейболдан ел чемпионатының 35-ші маусымы басталды. «Жетісу» Талдықорғандағы «Жастар» спорт сарайында 1-тур аясында «Ертіс» (Павлодар) командасымен ойнап, екі күнде де айқын жеңіске жетті. Чемпионатты сәтті бастаған жетісулықтар келесі турда Түркістанда 15-16 қазанда «Тұранмен» кездеседі.
Чемпионаттың биылғы форматы ерекше. Үйде және түзде. Бір турда екі ойын. «Жетісу» алғашқы турда «Ертісті» (Палводар) қабылдап, 1-күні 3:0 (25:10, 25:16, 25:13), 2-күні 3:0 (25:11, 25:15, 25:20) есебімен айқын жеңді.
– Маусымның басталғаны үшін қуаныштымыз. Екі ойындағы негізгі мақсат – бапкердің айтқанын мүлтіксіз орындап, тактикалық тұрғыда басымдыққа ие болу. Ал біз осы жоспарымызды толықтай орындай алдық деп ойлаймыз. Әрине, аз-кем кемшілік болды, біз сол олқылықты келесіде қайталамау үшін барымызды саламыз. Жаттығуды үдетеміз. Бізді үлкен жарыстар күтіп тұр, – дейді команда капитаны Ирина Кенжебаева.
Алғашқы турдағы ерекше оқиғаның бірі «Жетісу» командасының тәрбиеленушісі, 15 жастағы Ульяна Кокинаның негізгі командада дебюттік ойын өткізгені. Биылғы форматтың ерекшелігі – таңертең қосалқы құрам (U 21) кешкісін негізгі команда ойнайды. Ал Ульяна бір күнде екі ойынға қатысқан биылғы чемпионаттағы алғашқы ойыншы. Қосалқы құрам да (U 21) 1-турда «Ертіс-2» командасын сенімді жеңді. Ульяна негізгі командамен Катмандуда (Непал) қазанның аяғында болатын клубтар арасындағы Орталық Азия чемпионатына барады.
Алғашқы турда «Жетісу» сапынан «Үздік ойыншы» Перизат Нұрбергенова болса, қосалқы құрамда либеро Ольга Цой көзге түсті.
«Жетісу» волейбол клубының кестесі тығыз. Түркістанда (15-16 қазан) 2-тур ойындарын өткізсе, басқа командалармен салыстырғанда уақытынан бұрын 3-тур ойындарын «Қуанышпен» 27-28 қазанда ойнап, артынша іле-шала Непалға жол жүреді. Өткен маусымның чемпиондары биыл да сол атақты сақтап қалғысы келеді.
«Жетісу-Ақпарат»
