Елімізде іскерлік белсенділік жоғары деңгейге көтеріліп, шағын және орта бизнес пен сыртқы сауда саласында маңызды оң өзгерістер тіркелді, – деп хабарлайды 7-su.kz ақпараттық порталы Үкіметтің баспасөз қызметіне сілтеме жасап.
Премьер-министрдің орынбасары – ұлттық экономика министрі Серік Жұманғарин мәлімдегендей, өзін-өзі жұмыспен қамтыған азаматтарды қосқанда, кәсіпкерлік субъектілерінің жалпы саны 32,5%-ға артып, 3,2 млн-ға жетті. Жалпыға бірдей белгіленген режимде жұмыс істейтін, қосымша құн салығын төлейтін бизнес өкілдерінің қатары 28%-ға өсті. Мемлекет тарапынан жасалған қолайлы жағдайлардың нәтижесінде азаматтар көлеңкелі экономикадан шығып, заңды тіркеуге тұруда. Арнайы режимде 981 мың адам тіркелсе, соның 807 мыңы салық есебіне алғаш рет алынды.
Ағымдағы жылдың тоғыз айында 277 мың жаңа кәсіпкерлік субъектісі тіркелді. Оның ішінде 34,7 мың заңды тұлға және 242,3 мың жеке кәсіпкер бар. Осы аралықта 356 мың жеке кәсіпкер есептен шығарылғанымен, бұл экономикалық белсенділіктің тоқтағанын білдірмейді. Тіркеуін жапқандардың 42,6%-ы өткен жылы ешқандай табыс таппаған болса, 20,8%-ы өз қызметін ары қарай жалғастырып, өзін-өзі жұмыспен қамтығандар форматына өтті. Мұндай икемділік отандық бизнес ортаның ішкі және сыртқы өзгерістерге бейімделгіш екенін айқын көрсетеді.
Сыртқы экономикалық салада да елеулі ілгерілеу байқалады. Ұлттық банк төрағасының бірінші орынбасары Ерұлан Жамаубаев хабарлағандай, қыркүйек айының қорытындысы бойынша іскерлік белсенділік индексі 50,4 тармаққа жетті. Бірінші жартыжылдықта тауарлар мен қызметтер экспорты 25,4%-ға өсіп, 55,3 млрд доллар болды. Бизнесті қолдау мақсатында берілген қарыздар көлемі 16,4 трлн теңгені құраса, депозиттер жылдық мәнде 17,2%-ға көбейіп, 50,2 трлн теңгеге жетті. Резервтер мен Ұлттық қор активтерінің өсуі қаржылық жүйенің сенімділігін арттыра түседі.
Кәсіпкерлік пен экспортымыздың бұлайша дамуы Жетісу облысы сияқты өңірлерде де жаңа жұмыс орындарын ашуға, жергілікті өндірісті жандандыруға зор мүмкіндік береді. Бизнес ашу рәсімдерінің жеңілдеуі мен қаржылық қолдау шаралары әрбір азаматтың өз ісін бастауына жол ашады. Шағын және орта бизнестің қанат жаюы ел экономикасының әл-ауқатын көтеретін басты қозғаушы күш болып қала береді.
