Қазақстанда энергетика саласы тұрақты дамып, елді үздіксіз электр қуатымен қамтамасыз ету бағытында кешенді іс-шаралар жүзеге асырылуда, – деп хабарлайды 7-su.kz ақпараттық порталы.
Үкімет отырысында Энергетика вице-министрі Ерлан Акбаров тоғыз айдағы саладағы даму қорытындылары бойынша баяндама жасады. Қаңтар-қыркүйек айларының қорытындысы бойынша елімізде электр энергиясын өндіру көлемі 91,7 млрд кВт/сағатқа дейін артты. Электр энергиясы тапшылығын төмендету мақсатында ағымдағы жылы шамамен 2,4 ГВт дәстүрлі энергетикалық қуат көздерін пайдалануға беру межеленіп отыр. Аталған тізімге Алматыдағы қуаты 557 МВт болатын ЖЭО-2 мен 544 МВт болатын ЖЭО-3-ті жаңғырту жобалары, қуаты 1000 МВт болатын Түркістан облысындағы бу-газ қондырғысының құрылысы, сондай-ақ №11 турбоагрегатты іске қосу және Атырау ЖЭО-да №15 қазандықты орнату енеді. Қазіргі уақытта қуаты 240 МВт болатын Қызылорда облысындағы бу-газ қондырғысы, сондай-ақ қуаты 17 МВт болатын Текелі энергия кешеніндегі генераторы бар үш кәдеге жарату қазандығы мен бу турбинасы жұмысын бастады.
Сондай-ақ баламалы және қайта өңделетін қуат көздерін дамыту бағытында жүйелі қадамдар жасалуда. Энергетика вице-министрі Ерлан Акбаров саладағы көрсеткіштерді атап өтті:
«Өткен 9 айда ЖЭК нысандары 7,8 млрд кВт/сағат электр энергиясын өндірді. Биылға жоспар – 8,8 млрд кВт/сағат. 2026 жылы жиынтық қуаты 245,8 МВт болатын 10 ЖЭК нысанын пайдалануға беру жоспарлануда. Бүгінде жалпы қуаты 212,6 МВт болатын 7 ЖЭК нысаны іске қосылды. Жыл соңына дейін қуаттылығы 30 МВт болатын 2 СЭС нысанын, сондай-ақ қуаттылығы 3,2 МВт болатын 1 СЭС нысанын іске қосу жоспарлануда».
Энергия қуатын арттыру Жетісу өңірі сияқты аймақтардың өндірістік орындарын тұрақты электр көзімен қамтамасыз етуге зор мүмкіндік береді. Әсіресе Текелі энергия кешенінің қуатын кеңейту және жаңа ЖЭК нысандарын іске қосу аймақтағы экологиялық жағдайды жақсартып, тұтынушыларға сапалы қызмет көрсетуге жол ашады. Мұндай инфрақұрылымдық жобалар жаңа өндіріс орындарын ашуға, өңірлік экономиканы ілгерілетуге және халықтың тұрмыс сапасын арттыруға септігін тигізеді.
