Әр елдің тарихында болашағына бағыт берген, ұлттық санасы мен мемлекеттік негізін айқындаған маңызды күндер бар. Қазақ елі үшін сондай айтулы даталардың бірі – 25 қазан Республика күні.
Өткенге тағзым етіп қана қоймай, алдағы мақсаттарды бағамдайтын мерекеде әрқайсымызды ел болашағы үшін не істей аламыз деген сауалға ой жүгіртуге жетелейді. Өйткені жарқын болашақ өздігінен қалыптаспайды. Ол бүгінгі шешімдерден, адал еңбектен және келер ұрпақ алдындағы жауапкершіліктен басталады.
Энергетика саласы да осы дамудың маңызды бөлігі. Себебі тұрақты электрмен жабдықтау – тұрғындардың күнделікті тұрмысы, кәсіпкерліктің жұмысы және өндірістің дамуы үшін қажетті шарттардың бірі. Энергетикалық инфрақұрылымды жетілдіру мен жаңғырту – бүгінгі қажеттілікті қамтамасыз етумен қатар, келешекке жасалған инвестиция.
Облыстағы «ТАЭТК» АҚ – Ұлттық жоба аясында өңірдің электр энергетикалық инфрақұрылымын жаңғырту үстінде. Бүгінде Ақсу, Ескелді, Кербұлақ, Көксу, Қаратал, Сарқан аудандарының аудан орталықтарында және Талдықорған қаласында сондай-ақ бірқатар елді мекенде тозығы жеткен электр желілерін жаңарту жұмыстары жүргізілуде. Бұл бастамалар электрмен жабдықтау жүйесінің сенімділігін арттырып, желілердің техникалық жағдайын жақсартуға және тұрғындарды сапалы электр энергиясымен қамтамасыз етуге бағытталған. Сонымен қатар энергетика саласында цифрландыру бағытындағы жұмыстарға да ерекше мән берілуде. Заманауи автоматтандырылған жүйелерді енгізу – электрмен жабдықтау үдерістерін тиімді басқаруға, желілердің жұмысын бақылауды жетілдіруге және туындауы мүмкін ақауларды жедел анықтауға мүмкіндік беретін маңызды қадам. Осы бағытта Талдықорған қаласында автоматтандырылған жүйеге көшу жұмыстары жүргізіліп жатыр.
Алдағы жылдары цифрландыру аясында қалған аудандарда да осындай жүйелерді енгізу көзделген. Бұл бастамалар электр энергетикасы саласының жұмысын жаңа деңгейге көтеріп, инфрақұрылымның сенімділігі мен тиімділігін арттыруға ықпал етеді. Мұндай жаңғырту және цифрландыру жұмыстарының маңызы тек бүгінгі қажеттілікті өтеумен шектелмейді. Олар – өңірдің тұрақты дамуына жол ашып, халықтың тұрмыс сапасын арттыруға және болашақ ұрпақ үшін заманауи әрі сенімді инфрақұрылым қалыптастыруға бағытталған нақты қадамдардың бірі.
Дегенмен елдің қуаты тек экономикасымен немесе өндірістік көрсеткіштерімен өлшенбейді. Оның шынайы күші – қоғамның бірлігінде, адамдардың өзара сенімінде, туған жерге деген ізгі құрметінде. Әр азамат өз ісіне жауапкершілікпен қарап, ортақ іске үлес қосқанда ғана жарқын болашақ дамуының іргесі нығая түседі.
Тәуелсіздігіміздің тұғыры берік, бірлігіміз бекем, болашағымыз нұрлы болсын! Республика күні құтты болсын!
Е. ЖЕТПИСБАЕВА,
«ТАЭТК» АҚ баспасөз
хатшысы
