Еліміздің барлық өңірінде өтіп жатқан «Дала дәмі» ауыл шаруашылығы жәрмеңкелері отандық өндірушілерді қолдау мен халықты сапалы азық-түлікпен қамтамасыз етуде жоғары нәтиже көрсетіп келеді, – деп хабарлайды 7-su.kz ақпараттық порталы.
Осы аптада республика бойынша тұтынушыларға 7,5 мың тоннадан астам балғын әрі экологиялық таза азық-түлік өнімі ұсынылды. Базар нарқынан айтарлықтай арзан бағада сатылған өнімдердің 3 мың тоннадан астамы елордасы Астана қаласының тұрғындарына тиесілі. Мұндай ауқымды игі бастама халықты қолжетімді тауарлармен қамтып, ішкі нарықтағы баға тұрақтылығын сақтауға тікелей ықпал етеді.
«Дала дәмі» жәрмеңкелерінің басты артықшылығы – отандық шаруалар мен тұтынушылар арасындағы тікелей сауда байланысын орнату. Бұл формат өндірушілерге өз өнімдерін алыпсатарларсыз, ортадағы делдалсыз сатуға жағдай жасаса, ал тұрғындарға табиғи әрі балғын азық-түлікті өндірушінің өзінен тікелей сатып алуға зор мүмкіндік сыйлайды. Сондай-ақ отандық тауар өндірушілердің нарықтағы орнын нығайтып, ауыл шаруашылығы саласының экономикалық әлеуетін көтереді.
Астана қаласында өңіраралық сауда шаралары 19 қыркүйектен бері тұрақты түрде ұйымдастырылуда. Елордадағы «Қазанат» ипподромының аумағында өткен кезекті жәрмеңкеде Қарағанды мен Қостанай облыстарынан келген 140-тан астам ауыл шаруашылығы тауар өндірушісі өз өнімдерін астаналықтарға ұсынды. Бұған дейін де Қызылорда, Атырау, Ақтөбе, Шығыс Қазақстан, Батыс Қазақстан, Түркістан, Солтүстік Қазақстан, Павлодар және Ұлытау облыстарының фермерлері елордада өз өнімдерін сәтті өткізген еді.
Осындай өңіраралық сауда байланыстары Жетісу өңірінің де аграрлық секторын дамытуға үлкен серпін береді. Жетісудың құнарлы жерінде өсетін бақша, көкөніс, ет пен сүт өнімдерін ірі шаһарларға алып шығу жергілікті шаруалардың табысын арттырады. Бағаны арзандату мен сапаны сақтауға бағытталған оң шешімдер елдің азық-түлік қауіпсіздігін нығайтып, ауыл кәсіпкерлігін дамытудың тиімді құралына айналды.
