Жетісу облысы Кербұлақ ауданының орталығы Сарыөзек ауылында тұрғын үй инфрақұрылымын жаңарту және халықты қауіпсіз баспанамен қамтамасыз ету бағытында кешенді жұмыстар атқарылуда, – деп хабарлайды 7-su.kz ақпараттық порталы inbusiness.kz сайтына сілтеме жасап.
Аудан орталығындағы баспана инфрақұрылымын сауықтыру мақсатында 120 жаңа пәтер кілті өз иелеріне табысталса, тағы бір 60 пәтерлі тұрғын үйдің құрылысы аяқталуға жақын қалды. Сарыөзектегі Рысқұлов пен әл-Фараби көшелерінің бойында орналасқан, 1960-1970 жылдары бой көтерген ескі үйлердің тозығы жетіп, салдарынан 240 отбасы тұратын ғимараттар ресми түрде апатты деп танылған еді. Осы күрделі түйткілді оңтайлы шешу мақсатында 2024 жылдан бері жоспарлы шаралар жүзеге асырылып келеді.
Өңірдегі тұрғын үй құрылысының қарқыны мен апатты баспана иелерін қоныстандыру барысы туралы Жетісу облысының әкімі Бейбіт Исабаев арнайы тоқталды. Аймақ басшысы: «Апатты үйлердің тұрғындарына 2024 жылы бір 60 пәтерлі тұрғын үй пайдалануға берілген. Жуырда жаңа 60 пәтерлі үйден пәтерлер тапсырылды. Жыл соңына дейін тағы бір 60 пәтерлі үйдің құрылысы аяқталады. Сонда Сарыөзектегі апатты үйлердің мәселесін толық шештік деп айта аламыз», – деп атап өтті.
Сонымен қатар аймақта мемлекеттік бюджет есебінен сатып алынған 127 жеке тұрғын үй заңды кезек ретіне сәйкес үлестірілуде. Бүгінгі таңға дейін оның 80-і тиісті отбасыларға табысталды. Бұдан бөлек, халықтың әлеуметтік осал топтарын қолдау бағдарламасы аясында 157 жеке тұрғын үйдің құрылысы белсенді жүргізілуде. Аталған құрылыс нысандары биыл толық аяқталып, келесі жылы кезекте тұрған азаматтардың игілігіне беріледі.
Сарыөзектегі бұл оң өзгерістер Жетісу өңірінің әлеуметтік-экономикалық дамуын жеделдетіп, ауыл тұрғындарының өмір сүру сапасын жаңа деңгейге көтереді. Тозығы жеткен баспаналардан жаңа, жайлы пәтерлерге көшу отбасылардың әл-ауқатын арттырып, өңірдегі халық санының тұрақтануына және ішкі миграцияны реттеуге оң ықпал етеді. Сондай-ақ сапалы инфрақұрылым құру ауылды мекендерді көркейтудің берік кепілі болып саналады.
