Қазақстанда студенттер бакалавриат бағдарламасын төрт жыл орнына үш жыл ішінде аяқтап шығу мүмкіндігіне ие болды, – деп хабарлайды 7-su.kz ақпараттық порталы.
Бұл бастама еңбек нарығына қажетті білікті мамандарды даярлауды жеделдетіп, жастардың уақытын тиімді пайдалануға жағдай жасайды. Жоғары білім жүйесіндегі мұндай жаңашылдық білім сапасын төмендетпей, оқу процесін заманауи ыңғайда ұйымдастыруды көздейді.
Ғылым және жоғары білім министрлігі өкілдерінің сөзінше, мұндай қадам механикалық түрде оқу мерзімін қысқарту емес. Негізгі мақсат – академиялық кезеңдерді дұрыс жоспарлап, студенттердің кәсіби ортаға ерте араласуына жол ашу.
«Бұл – ең алдымен уақытты тиімді жұмсау процесі. Сондай-ақ академиялық кезеңдерді оңтайлы пайдалану үшін жоғары оқу орындары біртіндеп көшіп жатыр. Мұнда ескеретін жайт – демалыс мерзімі сәл азырақ болады, сабақ кестесі ертерек басталады. Әрбір жоғары оқу орны дербес шешіміне байланысты жаңа форматты таңдайды», – дейді Жоғары және жоғары оқу орнынан кейінгі білім комитеті төрағасының орынбасары Жанна Есінбаева.
Байқап отырғанымыздай, оқу мерзімі азайғанымен, студенттер меңгеруі тиіс білім көлемі бұрынғыша қалады. Төрт жылдық бағдарламадағыдай, жастар 240 академиялық кредитті толық игеруі қажет. Кейбір ерекше бағыттар бойынша бұл көрсеткіш 300 кредитке дейін жетеді. Яғни оқу жүктемесі тығыз әрі қарқынды түрде жүргізіледі.
Қазіргі таңда елімізде 16-17 мыңға жуық студент триместрлік жүйемен білім алуда. Оқу жылы дәстүрлі екі семестрге емес, үш кезеңге бөлінген. Бұл жүйе көбіне ақпараттық технологиялар, бағдарламалау, киберқауіпсіздік, жасанды интеллект, деректерді талдау, бизнес-аналитика мен маркетинг сияқты динамикалық дамып жатқан салаларға енгізілген.
Ал медицина, ветеринария, педагогика және архитектура сияқты ауқымды тәжірибені қажет ететін мамандық өкілдері 3 жылдық жүйеге өте алмайды. Себебі бұл бағыттарда теориямен қатар тереңдетілген клиникалық әрі практикалық дайындық аса маңызды.
Еске сала кетсек, еліміздегі білікті кадр тапшылығы мәселесін шешу үшін «үш жылдық бакалавр» жүйесін кеңірек қолдану туралы ұсыныстар бұған дейін де айтылған болатын. Бұл өзгеріс студенттерге еңбек нарығына ертерек шығып, өз саласы бойынша табыс табуға, ал жоғары оқу орындарына заман талабына сай икемді болуға мүмкіндік береді.
