Үкімет отырысында Мемлекет басшысының «Жаңа тарихи кезеңдегі Қазақстанның өзекті міндеттері» атты Жолдауын іске асыру бойынша маңызды шаралар талқыланды, – деп хабарлайды 7-su.kz ақпараттық порталы.
ҚР Өнеркәсіп және құрылыс вице-министрі Иран Шархан геологиялық барлау, сумен жабдықтау және құрылыс секторын жаңғыртудың жаңа тәсілдерін ұсынды. Елімізде алғаш рет 1:50 000 масштабтағы мемлекеттік геологиялық түсірілім бастау алды. Алдағы үш жылда 100 мың км² аумақта 20 жобаны жүзеге асыру жоспарланып отыр. Кен орындарын іздеуде жасанды интеллект, Ionic Leach технологиясы, спутниктік деректер мен ұшқышсыз ұшу аппараттары қолданылуда. Бастапқы геологиялық ақпараттың 100%-ы, яғни 4,8 млн бірлік толығымен цифрландырылды.
Өнеркәсіп пен өндірісті ілгерілету мақсатында Астана қаласында аса маңызды шикізат материалдары саласында Ұлттық зертхана құру ұсынылды. Сонымен қатар нарықтағы сұраныс пен ресурстардың қолжетімділігін бағалайтын Өндірістік қуаттар теңгерімін бағалау әдістемесі бекітілді. Ал «Халықтық құрылыс» бағдарламасы аясында отандық өндіріс қуаттарын кеңейтіп, отандық тауар өндірушілерді қолдау және импорттық өнімдермен негізсіз алмастыруға жол бермеу шаралары жүзеге асады.
Құрылыс және коммуналық инфрақұрылым бағытында да кешенді қадамдар жасалуда. Елімізде күшіне енген жаңа Құрылыс кодексі рұқсат беру рәсімдерін цифрландыруды және «Е-Құрылыс» жүйесі арқылы сапаны бақылауды міндеттейді. Оған қоса, ауылдардағы сумен жабдықтау жүйелеріне түгендеу жүргізіліп, су берудегі үзілістерді жою және ірі кәсіпорындарды қайта өңделген суды тұтынуға көшіру жүйелі түрде орындалмақ.
Еліміздегі бұл кешенді реформалар өңірлердің де тұрақты өркендеуіне берік негіз қалайды. Геологиялық барлау мен инфрақұрылымды цифрландыру жаңа өндіріс ошақтарының ашылуына, ауылдық аймақтардағы су сапасының артуына және отандық құрылыс компанияларының әлеуетін арттыруға мүмкіндік береді. Осындай жүйелі өзгерістер халықтың өмір сүру сапасын көтеріп, ел экономикасының технологиялық тәуелсіздігін қамтамасыз етеді.
