«Кітап оқитын ұлт» республикалық марафоны аясында облыстық әдістемелік орталықта арнайы кітап бұрышы ашылды. Игі бастама қызметкерлердің кітап оқу мәдениетін қалыптастырып, рухани танымын кеңейтуді көздейді, – деп хабарлайды 7-su.kz ақпараттық порталы.
Облыстық әдістемелік орталық республикалық марафонға белсене қатысып, кітап оқуды күнделікті дағдыға айналдыруға ерекше көңіл бөлуде. Енді әдіскерлер жұмыс арасындағы үзіліс уақытында көркем әдебиет пен танымдық туындыларды оқып, өзара пікір алмаса алады.
– Кітап оқу – адамның ой-өрісін кеңейтіп, кәсіби және рухани дамуына жол ашады. Әдіскерлердің кітапқа ден қоюы – ұстаздар қауымына үлгі. Біздің мақсатымыз – кітап оқуды уақытша науқан емес, тұрақты мәдениетке айналдыру, – дейді «Кітап оқитын ұлт» жобасы офисінің үйлестірушісі Меруерт Нұрғалиева.
Бұл бастама білім саласы мамандарының зияткерлік әлеуетін арттырып, ұжымда кітап оқу мәдениетін нығайтуға ықпал етпек.
