Әлемдік аренада көк Туымызды желбіретіп жүрген ауыр салмақ дәрежесінде жұдырықтасатын былғары қолғап шебері Еділ Қожамбердиев Кеңес Одағының батыры, гвардия полковнигі Бауыржан Момышұлы атындағы 5571 әскери бөлімінің жеке құрамымен кездесті.
Шара барысында боксшының өнегелі өмір жолы туралы айтылып, алдағы уақыттағы жоспарлары талқыланды. Шараның басты мақсаты – жеңімпаздардың жарқын жеңістер жолындағы жемісті еңбектері арқылы жауынгерлерді жігерлендіру. Чемпионмен жүздесу барысында сарбаздар сан түрлі сауалдарын жолдап, екіжақты пікір алмасты. Боксшы Отан қорғаушылармен өмірлік сабақтарымен бөлісті. Сарбаздардың патриоттық рухы көтеріліп, кейбірінің боксқа деген қызығушылығы арта түсті. Саңлақ спортшы сондай-ақ, алдағы жоспарларымен бөлісіп, құқықтық тәртіп әскерінің жауынгерлеріне жауапты қызметтері үшін ризашылығын білдірді.
– 27 желтоқсанда Балуан Шолақ атындағы республикалық спорт сарайында 12 раундық жекпе-жек өтеді. Сол додада мықты-мықты қарсыластармен жұдырықтасамыз. Оны “ҚазСпорт”, “Хабар” арналарынан тікелей эфирде тамашалай аласыздар. Қазақ боксының жанашырларын жанкүйер болуға шақырамын! – деді былғары қолғар шебері.
Айта кетейік, Еділ Қожамбердиев бала күнінен спортқа жақын болған. Теледидар арқылы аты аңызға айналған чемпион Майк Тайсон мен Мұхаммед- Әлидің спорттық жолына қызығып, балалық арманын жүзеге асыру мақсатында өз-өзін жан-жақты шыңдаған. Мектеп қабырғасында оқып жүрген шағында-ақ кик-боксинг үйірмесіне қатысып, арманының алғашқы баспалдақтарын бастаған. Қажырлы еңбек пен шыдамдылықтың арқасында Азия, Әлем чемпионатына қатысып, өзін жеңіспен дәлелдей білді. 2017 жылдан бастан кәсіпқой боксқа бет бұрған. Бүгінде еліміздің Туы мен Әнұранын әлемге паш етіп жүрген, ел мақтанышына айналған қайталанбас тұлға.
Шара соңында Еділ Қожамбердиев әскери қызметшілермен естелікке суретке түсті. Әскери бөлім командирінің тәрбие және әлеуметтік-құқықтық жұмыстар жөніндегі орынбасары подполковник Ұлықбек Қараев “Оңтүстік” өңірлік қолбасшылығының қолбасшысы генерал-майор Талапкер Әміреевтің атынан құрметті қонаққа алғыс хат табыстап, алтын уақытын бөліп жеке құраммен кездесу өткізгеніне ризашылық білдірді.
