Облыста мемлекеттен қайтарымсыз қаржы алып, жұмысын дөңгелентіп жатқандар жетіп артылады. Солардың бірі – кәсіпкерлікті дамыту ұлттық жобасы аясында «Оңалту медициналық орталығы» инновациялық бизнес жобасы бойынша конкурсқа қатысып, мемлекеттен 5 млн. теңге грант қаражатын ұтып алған «Мейірім» оңалту орталығы.
Талдықорғанда орналасқан орталықта 32 білікті маман жұмыс істейді. Дәрігерлер заманауи жабдықтар арқасында мүмкіндігі шектеулі, ауыр жарақат алған адамдарды аяққа тұрғызып, қалыпты өмір салтына оралуға көмектесуде. Білгір дәрігерлер инсульт, инфаркт, жол апатынан зардап шеккен, миға, жұлынға ота жасалған жағдайдан кейінгі науқастарды емдейді. Орталық алғаш ашылған жылы 500-ге жуық адам ем қабылдаса, биыл 700-ден астам пациент қаралыпты. Қуантарлығы оңалту орталығына жүре алмай келіп, аяқтан тік тұрып кеткен науқастар көп. Солардың бірі Ақсу ауданының тұрғыны Төлеген Есімбеков.
– 2023 жылы инсульт алып, аяқ қолым істемей қалды. Осылайша «Мейірім» оңалту орталығына жүгіндім. Қазір жағдайым жақсы. Аяғымнан тік тұрғызып 3 ай сайын массаж, ем-дом жасаған дәрігерлерге алғыс айтамын. Орталықтың ерекшелігі мұнда укол, система, дәрі-дәрмегімізді тегін аламыз. 5 уақыт тамақ береді, – дейді зейнеткер.
«Мейірім» оңалту орталғы басшысының айтуынша орталыққа облыс қана емес, өзге аймақтан да науқастар жүгінеді екен.
– Мемлекеттен 5 млн. теңге қайтарымсыз грант алып, 2023 жылы оңалту орталығын аштық. Алғаш ашылғанда 16 адамды жұмысқа алдық. Қазір 32 маман жұмыс істейді. Мемлекеттен берілген қаржыға Польшадан инсульт, грыжаны емдейтін «Levitas» және Ресейден ауыр жарақат алғандарға арналған «Иммитрон» аппаратын алдық. Заманауи аппараттармен жабдықталған орталыққа ем алуға әр аймақтан адамдар келеді. Мәселен биыл шығыстан және Алматы облысынан келген науқастарды емдедік, – дейді орталық директоры Ерасыл Еділханұлы.
Мұнда келушілер денсаулық жағдайына қарай 10-14 күн жатып ем алады екен. Орталықта бір күнде 60 адамды қабылдауға мүмкіндік бар. Мамандар алдағы уақытта рак, қант диабетіне шалдыққан науқастарды қарауға арналған орын ашуды жоспарлауда.
Айдар ҚАЛИЕВ
Фото: damu.kz
