Талдықорғанда Мәдениет және ақпарат министрлігінің қолдауымен құрылған «SARAP» эксперттік клубының жиыны өтті. Онда отбасы саясаты, отбасылық құндылықтар, азаматтық қоғамның жаңа көрінісі, заманауи коммуникация құралдары туралы мәселелер талқыланды. Қазақстандық қоғамдық даму институты басқарма төрағасының орынбасары Олжас Бейсенбаевтың айтуынша, биыл алғаш рет бірден екі мұғалім ең жоғары мемлекеттік марапатқа ие болған. Яғни, «Қазақстанның Еңбек Ері» атағын алды. Жалпы бүгінге дейін педагогтер арасында мұндай марапатты 137 ұстаз алған.
Сондай-ақ ол жария саясат арқылы халықты саяси шешімге қатыстырудың тетіктері кеңейгенін айтты.
– Мәселен, Ұлттық құрылтай, барлық деңгейдегі қоғамдық кеңестер, Е-өтініш, Ulttyq quryltai мобильді қосымшасы, референдумдар соның дәлелі, – дейді қоғамдық даму институты басқарма төрағасының орынбасары.
Шара аясында Қазақстандық қоғамдық даму институтының «Media-Lab» орталығының әдістемелік сүйемелдеу басқармасының басшысы Жақсыбек Жиеналиев заманауи коммуникация құралдары туралы айтып, әлеуметтік медиа және балалар контенті жөнінде ой қозғады.
– Балалардың электрондық құрылғыларды белсенді пайдалануын, мультимедиялық контенттің олардың дамуына әсерін, сондай-ақ, мемлекеттік аппарат пен халық арасындағы микро және макро- климаттық қатынастардың қалыптасуын зерттеу ерекше назар аударуды талап етеді. Бұл тұрғыда мемлекет, халық және БАҚ арасындағы байланыстардың деңгейін, олардың әлсіз және күшті жақтарын анықтауға бағытталған кешенді зерттеулер жүргізілуде.
Шара шеңберінде облыстық қоғамдық кеңестің төрағасы Ерғазы Қошанбеков елдегі қоғамдық кеңестердің жұмысына шолу жасап, олардың жұмысын жақсарту бойынша бірқатар бастамаларды ұсынды. «Жетісу облысының Азаматтық Альянсы» қауымдастығының төрағасы Дания Қыдырбаева азаматтық қоғамның белсенділігі және жаңа қоғамдық мәдениет мәселелерін көтерсе, «Jetisý jastary» КММ директоры Арнай Байжұрынов елдің саяси өміріндегі жастардың рөлі туралы пікірін білдірді.
Медет ЖҰМАБАЙ
Фото: видеодан алынған кадр
