Көксу ауданы бойынша биыл әлеуметтік осал топтағы азаматтарға берілетін 50 жеке тұрғын үйдің құрылысы аяқталуға жақын. Осыған орай аудан орталығындағы ауылдарға барып, құрылыс жұмыстарымен танысып қайттық.
Алдымен Жарлыөзек ауылындағы 10 тұрғын үйдің құрылысын көрдік. «ВостокСтройЭнерджи» ЖШС салып жатқан 4 тұрғын үйдің құрылыс жұмысы аяқталыпты. Құрылысы аяқталған жеке тұрғын үйлер сатып алу бойынша ашық конкурс жарияланып, бір көзден сатып алу бойынша №79, 80, 81, 82 келісім-шарттары жасалды. Ал қалған 6 жеке тұрғын үйдің құрылыс жұмыстарының 70 пайызы тамамдалған. Құрылыс жұмыстарына 20 адам, 7 техника жұмылдырылуда.
– Мен Жарлыөзек ауылында туып, көшеде асық ойнап өстім. Ауылға үй салынады дегенде ерекше қуанып, туған жеріме бір көмегім тисінші деп әкімдікпен «Тұрғын үй салу, сатып алу» меморандумын жасадым. Яғни, өз қаржыма салған үйдің сапасын әкімдік тексеріп, сатып алады. Бізден әкімдік көлемі 60 шаршы метр үйдің ақшасын төлеп сатып алады. Сондықтан тұрғындарға көмек болсыншы деп үйді 71 шаршы метр қылып салып жатырмын. Баспананың қабырғасы газаблокпен, іші қызыл кірпішпен қаланған. Біз үй салып қана қоймай, үйдің сыртын абаттандырып, жолын асфальттап жатырмыз, – деді «ВостокСтройЭнерджи» ЖШС басшысы Болатбек Найманбеков.
3 бөлмелі үй 71 шаршы метрді құрайды. Аумағы 10 сотық. Заман талабына сай салынған баспанада ауызсу, жарық, торап толығымен тартылған. Сондай-ақ, инвесторлар көмек ретінде өз қаржысына үйдің сыртын қоршап, отын және көмір қора салып беріпті. Алдағы уақытта ауыл бойынша тұрғын үй кезегінде тұрған 70 отбасының 10-ы үйлі болмақ. Мамыр айының ортасында басталған құрылыс жұмыстары қараша айының 15-інде аяқталады.
Мұқыры ауылында 10 тұрғын үйдің құрылысын салу үшін «Көксу проект» ЖШС кәсіпкерлерімен меморандум жасалыпты. Қазіргі уақытта, жеке тұрғын үйлердің құрылыс жұмыстары қарқынды жүргізілуде. Үйлердің керегесі көтеріліп, төбелері толықтай жабылған. Тек ішкі әрлеу жұмыстары ғана қалыпты. Қазір мұнда 10 құрылысшы жұмыс істеп жатыр.
– Құрылыс жұмыстарының 70 пайызын аяқтадық. Бір үйге 15 млн. теңгеден астам қаржы жұмсадық. Халықтың батасын алу үшін үйді сапалы әрі уақытылы аяқтаймыз. Маусым айында басталған құрылыс жұмыстары қараша айының 10-нына дейін бітеді, – дейді «Көксу проект» ЖШС басшысы Алиакбар Бекұлы.
Балпық би ауылынан 23 тұрғын үйді «Smart Taldykorgan» ЖШС салуда. Оның ішінде 10 тұрғын үйдің құрылыс жұмыстары аяқталған. Құрылысы аяқталған 10 жеке тұрғын үйге мемлекеттік сатып алу бойынша ашық конкурс жарияланып, тұрғын үй сатып алу бойынша № 84, 85, 86, 87, 88, 89, 90, 91, 92, 93 келісім-шарттары жасалды. 13 жеке тұрғын үйдің құрылыс жұмыстары жүргізілуде. Балпық би ауылындағы қалған 7 тұрғын үйдің құрылысын «Atameken Grand Construction» ЖШС жүргізуде. Оның ішінде 3 тұрғын үйдің құрылыс жұмыстары аяқталды. Тамыз айында Балпық би ауылындағы 3 жеке тұрғын үйдің мемлекеттік сатып алу порталы бойынша «Kazahstan Grand Сonstaction» ЖШС-мен №72, №73, №74 келісімшарт жасалды. Қалған 4 жеке тұрғын үйдің құрылыс жұмыстары жасалуда.
Айдар ҚАЛИЕВ
Көксу ауданы
