«Қыс қыр астында» деген бар. Бұл кезеңде тұрғын үйлер мен әлеуметтік нысандардың жылы болуы маңызды.
Аудандық тұрғын-үй коммуналдық шаруашылығы бөлімі мамандарының айтуынша, өңірде 42 мектеп пен 5 балабақша сұйық, 7 мектеп пен 6 балабақша қатты отынмен, 1 мектеп пен 1 балабақша орталықтандырылған қазандықтан жылытылады. Бүгінде осы мекемелерге қажет дизель мен қатты отын толық жеткізілген. Мектептерді қатты отынмен қамтамасыз ету мемлекеттік сатып алу келісімшарты бойынша жеке кәсіпорынға жүктелген. Сұйық отынға арналған пештерге сервистік қызмет көрсетуге тендер ұтып алған кәсіпорын өкілдерімен келісім жасалып, жылыту маусымына дейін 50 білім беру мекемесі, 13 мемлекеттік балабақша пештері тексеріліп, тазартылып, жөнделген. Өткен қыста ақау шыққан пештер де ретке келтіріліп, іске қосуды аталған компания атқарған.
Тұрғындар үшін 52 мың тонна қатты отын қажет. Оларға 32739 тоннадан аса көмір жеткізілді. Ал тапсырыстағы қатты отын күнделікті тасымалдануда. Аудан аумағында «Алтынкөл» мен «Құндызды» темір жол стансыларындағы көмір түсіретін тұйықтарда 13 мың тоннадан аса «Шұбаркөл» мен «Қаражыра» көмірінің қоры бар. «Шұбаркөл» көмірінің стансы тұйықтарындағы бағасы 20 350-20 400 теңгеден сатылуда. Жергілікті көмірді тасымалдап, саудалаушылар «Шұбаркөл» көмірінің тоннасын тұрғындарға 28-30 мың теңге аралығында судалауда. Көмір бағасы күн суытқан сайын көтерілуі мүмкін.
Аудан әкімінің орынбасары Дидар Ешенов әлеуметтік нысандарға сұйық отынның 66,7 пайыздан астамының жеткізілгенін айтты. Өңірдегі жылу жүйесінің жалпы ұзындығы 2707 метрді құрайды. Аталған жылу жүйесіне техникалық қорытынды мемлекеттік сатып алудың электрондық порталы арқылы беріліп, мердігер мекеме биылғы маусымда оң шешім шығарды. Қыркүйек айындағы тексеріс бойынша Пенжім ауылдық округіндегі 3 қазандық келесі жылға дейін, ал Жаркент қаласындағы қазандықтар биылға жарамды деп танылып, одан әрі тексеруден өту керек деген техникалық қорытынды алынды.
Мырзағали Нұрсейіт
Панфилов ауданы.
