Қарағанды облысы Қарқаралы ауданы Теректі ауылының әкімі Әділжан Арғынов өрт сөндіру бойынша жедел штаб құрылатынын мәлімдеді.
Теректі ауылында өртті сөндіру бойынша жедел штаб құрылды. Төтенше жағдайлар, ТЖМ, қорғаныс министрлігінің ұшақтары және 386 адам жұмылдырылды.
“Қазір өртті сөндіру үшін барлық шара қабылданып жатыр. Өрт сөндірушілер тәулік бойы жұмыс істейді. Өтінемін, үрейленбеңіздер және қауесеттерге сенбеңіздер”, – деді ауыл әкімі.
Қарағанды облысында дала өртін сөндіру барысында 33 жастағы азамат қаза тапты. Төтенше жағдайлар министрлігінің мәліметінше, оқиға 6 қазанда Қарағанды облысында Қарқаралы ауданында дала өртін сөндіру кезінде болған.
«33 жастағы 24-ӨСБ аға өрт сөндіруші Хайрат Хали қызметтік борышын өтеу кезінде қаза тапты. Өлім жағдайлары нақтылануда. Сотқа дейінгі тергеу басталды. Ведомствоның Апаттар медицинасы орталығының психологтары көз жұмған қызметкердің туыстарына қажетті психологиялық көмек көрсетеді. Қазақстан Республикасы Төтенше жағдайлар министрлігі туыстары мен жақындарына қайғырып көңіл айтады», — деп хабарлады ТЖМ баспасөз қызметі.
Дала өртін сөндіру барысында төрт адам зардап шеккен. Олардың барлығы ауруханаға жатқызылды. Төрт науқастың да жағдайы тұрақты деп бағалануда.
Өрттің алдын-ала ауданы 3000 гектардан асқан. Бұл шамамен 4200 футбол алаңына тең.
