Облыста тіркеуде тұрған азаматтарға арналған «Жерұйық» тұрғын үй бағдарламасы іске қосылды.
Ауыл тұрғындарына арналған бағдарламаға өтінім қабылдау 10 қыркүйектен 10 қазанға дейін жалғасады. 5 пайыздық мөлшерлемемен берілетін ипотеканы мұғалім, дәрігер, мемлекеттік қызметшілер мен әлеуметтік осал топтағы азаматтар рәсімдей алады. Бағдарламаның бастапқы жарнасы 10%, несие 19 жылға беріледі. «Жер-ұйық» бағдарламасын жүзеге асыруға облыс бюджетінен 1 млрд. теңге қарастырылған. Жаңа жоба 8 аудан тұрғындарын қамтиды.
Бағдарламаға қатысуға өтінімдерді аудан әкімдіктеріндегі тұрғын үй-коммуналдық шаруашылығы бөлімінде қабылдайды. Өтінім мына талаптарға сәйкес болуы шарт. Бағдарламаға қатысушының және оның отбасы мүшелері меншігінде соңғы 5 жыл ішінде тұрғын үй (оның ішінде сатып алу құқығымен жалға берілетін тұрғын үй мен үлестің) болмауы керек. Отбасы мүшелеріне жұбайы, зайыбы және кәмелетке толмаған балалары жатады.
Сондай-ақ, соңғы жұмыс орнында міндетті зейнетақы жарналарымен расталған кемінде 6 ай жұмыс өтілінің және облысқа қарасты аудандарда немесе ауылдық округтерде тіркеудің болуы тиіс. «Отбасы» банк мамандарының айтуынша, үй алуға үміткерлер ұпай санына байланысты іріктеледі.
«Отбасы банк» АҚ Жетісу облыстық филиалының ресми өкілі Әсел Досанованың сөзінше, үйді көп ұпай жинағандар алады. Олардың санына отбасылық жағдай, балалардың болуы, облыстық тіркеудің ұзақтығы ықпалын тигізбек. Сонымен бірге, «жетім және ата-анасының қамқорлығынсыз қалған балалар» санаты бойынша бағдарламаға қатысушылар, бұған қоса, мүмкіндігі шектеулі азаматтар немесе мүмкіндігі шектеулі балаларды тәрбиелеп отырған азаматтарға қосымша ұпай қосылатын болады.
А. БАЙЖҰМАҚЫЗЫ
Фото: dzen.ru
