Шараға халықаралық ұйымдардың өкілдері мен елге танымал журналистер қатысуда. Спикерлер салада қордаланған, алаңда өзекті деп танылған мәселелерді талқыға салмақ.
ҚР Мәдениет және ақпарат министрлігінің баспасөз қызметінің алдын-ала ұсынған дерегінше,Үш күндік бағдарламада нарықтың ұдайы өзгеруіне байланысты мамандарды даярлау туралы пікір алмасулар, жасанды интеллект пен цифрлық технологиялардың қоғамға әсері туралы дәрістер бар. Қатысушылар ақпараттың жылдам ағыны жаңа форматтар мен мазмұн тәсілдерін құра отырып, медиа жұмысын қалай өзгертетінін талқылайды.
Бұдан бөлек «медиадағы құқықтық трансформация, көп платформалы экожүйелерді дамыту, өңірлік, спорттық және салалық журналистика, балалар контенті және әлеуметтік шиеленісті басқарудағы ахуалдық орталықтардың рөлі басты назарда болады» делінген ресми хабарламада.
Іс-шара аясында 25 және 26 қыркүйек күні Контент-Маркет өтеді. Онда телеарналар мен продакшндар озық медиа жобаларын таныстырады.
Сонымен қатар жабық питчингтер, кешкі нетворкинг, масс-медиа туралы жаңа заң бойынша интерактивті сессия және қазақ тіліндегі «Мақсат» атты жаппай диктант өтеді.
Шараның соңғы күні – 27 қыркүйекте «Үздік баспасөз қызметі» марапатын тапсыру рәсімі өтеді. Сонымен қатар, баспасөз хатшыларына арналған семинарлар өткізіліп, медиадағы инновациялар, ұлттық бірегейліктің рөлі, цифрлық коммуникациялар этикасы, ақпаратты тексеру және ақпараттың шамадан тыс жүктелуіне қарсы күрес секілді тақырыптар талқыланады
Қозыбай ҚҰРМАН
