5-ші Дүниежүзілік көшпенділер ойындарында қазақ күресінен ел қоржынына 8 алтын медаль түсті. Жарыстың алғашқы күні-ақ ұлттық құрама балуандары шиыршық атты. Боз кілемге 8 салмақ бойынша балуандар сынға түсіп, барлығы айтулы додада жеңімпаз атанды.
Сонымен алғашқы болып әйелдер командасы белдесті. Бұрымдылар арасында алтынды 48 келі салмақта ел намысын қорғаған Айжан Жылқыбаева жеңіп алды. Ол финалда қырғызстандық қарсыласы Л.Асакеевадан айласын асырды.
Ал ерлер арасында 55 келі салмақта жетісулық Бекжан Төлепов финалда тағы бір қырғызстандық балуанды қапы қалдырып, 5-ші Дүниежүзілік көшпенділер ойындарының чемпионы атанды. Осылайша Жетісу облысы үкілеп қосқан Бекжан намасты қолдан бермей Қазақ еліне алтын сыйлады.
Ізінше ерлерден -55 кг: Б.Төлепов (Қазақстан)К.Оболбеков (Қырғызстан), -60 кг: Е.Бакшиев (Әзербайжан)М.Берекетов (Қазақстан) -66 кг: Д.Тұқышев (Қазақстан)М.Ширинов (Өзбекстан), -74 кг: Е.Хасанов (Әзербайжан)Ж.Қожамбеков (Қазақстан) белдесулерінде отандастарымыз басым түсіп ел мерейін асқақтатты.
Ал әйелдер қатарында -48 кг: Л.Асакеева (Қырғызстан)А.Жылқыбаева (Қазақстан), -52 кг: С.Муродова (Өзбекстан)Н.Азаматова (Қазақстан), — 56 кг: А.Фатихова (Ресей)Р.Нұрмахамметова (Қазақстан), -60 кг: Б.Құсақбаева (Қазақстан)С.Лнияни (Польша) финалдық жұптарында да көк туымыз көп көтерілді.
Бір сөзбен айтқанда, байрақты бәсекеде үкілеген сегіз балуан да кеуделеріне жарқыратып алтыннан медаль тақты.
Осы ретте Көшпенділер ойынында төрешілік қызметті атқарып жатқан Жетісу облысы қазақ күресінен бас бапкері Ерлан Иманғалиев пікір білдірді:
— Көшпенділер ойынына күрес түрлерінен Жетісу облысының екі балуан қатысып жатыр. Ұлттық құраманың сапына енген 55 келідегі Бекжан Төлепов қазақ күресінен жеңімпаз атанды. Ертең 60 келі салмақта жетісулық Марат Нигматуллаев Өзбектің Кураш күресінен бақ сынаса, 12 қыркүиекте Түрік күресінен сынға түседі. Сенім артқан балуандар жеңіске жетеді деген үміт басым.
Ришад Тұрғанбай
Астана
