Жетісу облысының қолайлы табиғи-климаттық жағдайы жасыл энергетиканы дамытуға зор мүмкіндік беруде. Осы орайда Сарқан ауданының Басқан өзенінде екі бірдей су электр станциясы салынып жатыр. Жалпы қуаты жылына 76,5 млн. кВТ/сағ. болатын бұл екі жобаға 9,3 млрд. теңге инвестиция тартылып, жергілікті елу тұрғын жұмыспен қамтылмақ.
Облыста белгіленген қуаты 210,5 МВт болатын жаңартылған энергия көздерінің 15 нысаны бар болса, соның 4-еуі Сарқан ауданы аумағында орналасқан.
— Лепсі, Сарқан, Басқан өзендерінде 4 станция жұмыс істеп тұр. Бұдан бөлек қазіргі кезде «Baskan Power» ЖШС-ның «Басқан ГЭС-2» және «Басқан ГЭС-3» жобаларының құрылысы жүріп жатыр, бүгінгі күні шамамен 90 % аяқталды. Нысандар алдағы қазан айында салынып бітіп, іске қосылады деп жоспарланған. Мұндай жобалар біз үшін аса қажет, өйткені біріншіден, аймаққа инвестиция тартылады, екіншіден, тұрғындар үшін жаңа жұмыс орындары ашылады, үшіншіден, электр қуатының өндірісі артады, – дейді Сарқан аудандық кәсіпкерлік бөлімі басшысының міндетін атқарушы Ақан Иманжанов.
Екіаша ауылдық округіне қарасты аймақта салынған екі су электр стансысын басқару жүйесі тұтастай автоматтандырылған. Нысандар заманауи құрылғылармен толықтай жабдықталған. Қазір «Басқан ГЭС-2» нысанында 27 адам жұмысқа кірісті, ал екі станция толық іске қосылғанда тұрақты жұмыспен қамтылған азаматтар саны 50-ге жетеді.
ГЭС-ке жұмысқа орналасатындардың қатарында Екіаша ауылының тұрғыны Күнтуған Мұқашев те бар.
– 1986 жылы Қарағандыдағы энергетика институтын «энергетика» мамандығы бойынша бітіріп шықтым. Ауылға келген соң мамандық бойынша жұмыс табылмай дәнекерлеуші болдым. Енді, міне, ауылымыздың іргесінен су электр станциясы салынып, мамандығым бойынша жұмыс табылды. Тұрақты жұмысқа алынатын азаматтар қазірден-ақ өндірістік-тәжірибеден өтіп жатырмыз. Арамызда энергетика мамандығын бітірген ересек азаматтар да, ауылға оралған дипломды жастар да бар, – дейді ауыл тұрғыны.
Екіаша ауылдық округінің әкімі Дәулет Дүйсенбековтің айтуынша, Екіаша ауылында 3 мыңға жуық тұрғын бар. Елді мекен халқы негізінен егін салып, мал өсіреді. Оған қоса ГЭС құрылысы басталғалы жергілікті азаматтар тұрақты жұмысқа орналасып, табыс тауып отыр. Сондай-ақ, инвестор компания «Baskan Power» ЖШС өз қаражатына Екіаша ауылының тұрғындары үшін елді мекенге бау-бақшалық су жеткізетін «Әлімбай», «Қайран» каналдарының 37 шақырымын жаңғыртып, 7 шақырым ауылішілік жолға жөндеу жүргізуде.
Жалпы Жетісу облысында биыл қуаттылығы 42,1 МВт болатын жаңартылған энергия көздерінің 3 жобасын аяқтау жоспарланған, соның 2-еуі Сарқан ауданында, 1-еуі Ескелді ауданында. Ал 2026 жылға дейін тағы осындай 8 нысанды іске қосу межеленіп отыр.
Жетісу облысы әкімінің баспасөз қызметі.
