Алакөл ауданының әкімі Алмас Абдинов белгіленген кесте бойынша тұрғындарды қабылдап, олардың түйткілді сұрағын дер кезінде шешуге көмектесіп тұрады. Сонымен қатар ауыл, елді мекендерді жиі аралап, тұрғындармен кездесіп, ондағы шешімін күткен мәселелерді назарға алып, шешілу жолын көпшілікпен бірге қарастыруды да әдетке айналдырған.
Осы аптада аудан 12 азаматты жеке мәселелері бойынша қабылдады. Әрине, бүгінде өңірлерде қабылдауға жиі жүгінетіндердің дені тұрғын үй қорынан баспана алуға қатысты болатыны белгілі. Жоғарыдағы 12 азаматтың 10-ы дәл сол сұрақпен өңір басшысына жүгініпті.
Мұның да өзіндік себебі бар. Өйткені Алакөл ауданында соңғы жылдары үй кезегінде тұрған тұрғындарды түрлі жолдармен баспаналы етуге қатысты нәтижелі жұмыс жүріп жатыр. Өткен жылдың басында ауданда барлық қаржыландыру көздері есебінен 23058,0 шаршы метр тұрғын үй салу жоспарланса, жыл соңында 26092,0 шаршы метр үй салынып, жоспар 113 пайыз орындалған. Сол қатарда екі 20 пәтерлі және бір 60 пәтерлі жалдамалы тұрғын үй тұрғызылды. Сондай-ақ, әлеуметтік осал топтар үшін тұрғын үймен қамтамасыз ету мақсатындағы жұмыстар өз ретімен атқарылуда.
Дегенмен, салынып жатқан тұрғын үйлер мен әлеуметтік осал топтар үшін сатып алынып, бөлініп берілетін баспаналар ҚР «Тұрғын үй қатынастары туралы» Заңы негізінде белгіленген тәртіп және кезек ретімен беріледі. Алмас Сапарғалиұлы тұрғын үй бойынша келген азаматтарға оның жай-жапсарын толық түсіндіріп берді. Кейбір сұрақтар бойынша құзырлы мемлекеттік мекеме басшылары мен округ әкімдеріне тиісті тапсырма беріп, жедел шешімді қажет ететін мәселелерді өз бақылауына алатынын ескертті.
Міне, осылай азаматтар толғандырған барлық сауалына нақты жауап алды.
Қажет Андас
Алакөл ауданы
