Алакөлдегі Ақши жағалауындағы ерекше қажеттілігі бар балаларға арналған «Жансая» жазғы сауықтыру лагері өз жұмысын бастады. Жаңа маусымға демалушылардың алғашқы легі келді. Олар заңды өкілімен бірге орналасып, жаз қызығын қызықтамақ.
Облыстық жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаевтың айтуынша, өткен жылы жазғы кезеңде бұл лагерь 127 баланы тегін қабылдаған. Биыл да 160 баланы 1 заңды өкілімен тегін демалту жоспарланып отыр екен.
– Бұл орталық 40 орынға есептелген. Әр баланың демалу ұзақтығы 5 күн. Қабылдау I-ІІІ топтағы мүгедектігі бар баланың тіркелген жері бойынша дәрігердің ұсынысы немесе қорытындысы негізінде жүзеге асырылады. Орталыққа жол жүруді заңды өкіл немесе еріп жүретін адам тұрғылықты жерінен Үшарал қаласына дейін дербес жүзеге асырады, бұдан әрі оларды Ақши ауылына, лагерьге жеткізуді орталықтың өзі ұйымдастырады, – дейді облыстық жұмыспен қамтуды үйлестіру және әлеуметтік бағдарламалар басқармасы басшысы Ермек Мизамбаев.
Мөлдір Ахметова ұлы Қасен Әлиханды мұнда алғаш рет әкеліп отыр. Жасалған жағдай үшін дән риза.
– «Жансая» лагеріне алғаш рет келіп отырмыз. Аспаздар, медбикелер, жалпы сауықтыру орнында жұмыс істейтін қызметкерлердің бәрі де сондай мейірімді, өз ісіне берілген мамандар. Су да, сауықтыру шараларын жасайтын азаматтардың ақжарқын көңілі де – бәрі балама оң әсер етеді деп сенемін, – дейді ол.
Айта кетейік, лагерьдің негізгі мақсаты – медициналық, психологиялық, кәсіптік және әлеуметтік оңалту шараларын жүргізу арқылы мүмкіндігі шектеулі балалардың әлеуметтік мәртебесін қалпына келтіру және оны әлеуметтік ортаға бейімдеу.
Медет ЖҰМАБАЙ
