Журналистер үйінде облыстық төтенше жағдайлар департаменті суға шомылу кезіндегі қауіпсіздікті қамтамасыз ету мақсатында брифинг өткізді.
Шара Талдықорған қаласы ТЖБ азаматтық қорғаныс тобының аға офицері Бауыржан Манасовтың баяндамасымен ашылды. Ол:
– Судағы төтенше жағдайлар адамдардың құтқарушылар бақылауынсыз су айдындарында ұйымдастырылмаған демалысы, судағы қауіпсіздік ережелерін сақтамауы, жеке демалыс орындары иелерінің судағы қауіпсіздік талаптарын орындамауы, жүзе білмеуі және балаларды ересек адамдардың бақылауынсыз қалдыруынан туындайды. Осыған орай төтенше жағдайлар департаменті судағы қауіпсіздікті қамтамасыз ету мақсатында түрлі шара жүргізіп, қарқынды жұмыс атқарып жатыр, – деді.
Бауыржан Кендебайұлы Қаратал және Балықты өзендерінің бойында жүргізілген зерттеу нәтижелері бойынша 8 жабдықталмаған және рұқсат етілмеген шомылу орны анықталғанын айтты. Сондай-ақ, өзен бойындағы қауіпті және суға шомылу үшін жабдықталмаған аймақтарда бұрын орнатылған 43 тыйым салу және ескерту қауіпсіздік белгілері тексеріліпті. Тексеру барысында 43 белгінің 36-сында тыйым салу және ескерту белгілері бар екені анықталды. Маман алдағы уақытта қалалық білім бөлімімен бірлесе отырып, мектепке дейінгі білім беру мекемелерінде «Жазғы кезеңдегі судағы қауіпсіздік» тақырыбында ашық сабақтар, семинарлар, сурет салу бойынша жарыстар ұйымдастырылатынын жеткізді.
Аяулым ШЫНГАЕВА,
ЖУ студенті
