Жетісу облысында суармалы сумен қамту деңгейін жақсарту мақсатында 4 ауданда жаңа су қоймаларын салу көзделуде.
Бұл туралы облыстағы өңірлік коммуникация қызметінің алаңында өткен брифинг барысында «Қазсушар» РМК Жетісу филиалының директоры Саят Құдайбергенов хабарлады.
Биылғы вегетациялық кезеңнің өту барысы туралы баяндап берген филиал директоры мекеме теңгерімінде Жетісу және Алматы облыстарының аумағындағы 9 су қойма, 12 су торап, 3 су бөгеті және 5102,8 шақырымды магистральді, су таратушы канал және коллекторлық-дренаждық желілері бар екенін айтты.
Механикаландырылған тазарту жұмыстары бойынша облыста 92,632 шақырым ұзындықта, бетон жұмыстары 195,4 м3 көлемде жүргізілді. Жөндеу жұмыстары 8 бірлік гидротехникалық құрылыстарға, 7 бірлік гидрометриялық бекеттерге жасалынды. Облыста жаңа су шаруашылығы объектілерін салу, ирригациялық желілерді қалпына келтіру және реконструкциялау жөнінде іс-шаралар қабылдау мәселелері көзделген. Мәселен, Ескелді ауданындағы Балықты, Алакөл ауданындағы Жаманты, Көксу ауданындағы Быжы, Панфилов ауданындағы Қорғас, Өсек, Тышқан өзендеріне су қоймаларын салу көзделуде. Қазір жергілікті бюджеттен осы жобалардың техникалық-экономикалық негіздемелері әзірленуде. Аталған су қоймалары салынатын болса, ол өз кезегінде суармалы сумен қамтуға оң әсерін тигізетін болады.
Е. БАУЫРЖАНҚЫЗЫ
