Талдықорған қаласында 1 маусымнан бастап тұрмыстық қатты қалдықтарды «Жаңа-Сана» ЖШС шығаратын болады. Осыған орай жергілікті БАҚ өкілдерімен кездескен мекеме басшылары тұрмыстық қатты қалдықтарды тасымалдауға арналған 8 жаңа техникасын таныстырды.
Серіктестік қызмет өрісіне Талдықорғанның көппәтерлі тұрғын үйлері, қыркүйек айында қаланың жеке секторы қосылады. Қала әкімі Ернат Бәзілдің айтуынша, осыған дейін қала аумағындағы тұрмыстық қатты қалдықтарды шығарумен бірнеше компания айналысып келген. Ендігі кезекте бұл жұмыспен «Жаңа-Сана» ЖШС шұғылданып, қаланы толық қамтымақ. Мекеменің тағы бір ерекшелігі – әлеуметтік осал топтағы азаматтарға және көпбалалы отбасыларға, сондай-ақ, атаулы әлеуметтік көмек алатындарға да жеңілдік қарастырып отыр.
Жиында белгілі болғандай, «Жаңа-Сана» компаниясы барлық талапқа сай. Қала әкімдігі олармен 5 жылға келісімшартқа отырған. Егер жұмыс жақсы жүргізілсе, келісім тағы 5 жылға ұзартылмақ. Егер осы жылдар ішінде наразылық туындаса, онда шартта айыппұл санкциялары көзделген. Сондай-ақ, компания жазғы бақша кезеңінде 3 аптада бір рет дезинфекция, айына 1 рет кеміргіштерге қарсы дератизациялау, 3 аптада бір рет алаңдарға иістер мен зиянкестерге қарсы химиялық өңдеу жұмыстарын жүргізбек. Сонымен бірге компания 40-тан аса қала тұрғынын тұрақты жұмыспен қамтып отыр. Жалпы, бұл бағыттағы істің бәрі қала басшылығының бақылауында болмақ.
Өз кезегінде «Жаңа- Сана» ЖШС басшысы Алексей Савченко бұл жобаға 300 миллион теңге инвестиция салынғанын, жақында ғана Қорғастан 8 жаңа мамандандырылған көлік түрлері жеткізілгенін атап өтті. Жиын кезінде қоқыс тиейтін көліктердің бірінің жұмысын өндірістік учаске бастығы Андрей Кротов көрсетті.Қыркүйекке дейін техника саны 12-ге жеткізілмек.
Талдықорған қаласында 853 көпқабатты және 24,5 мың тұрғын үй бар, соның 14 мыңнан астамы заңды тұлға. «Жаңа-Сана» компаниясы жасалған шарттар негізінде көп- қабатты тұрғын үй және қыркүйектен бастап жеке сектормен жұмыс істейтін болады. Заңды тұлғаларға экономикалық тұрғыдан кіммен жұмыс істеу тиімді болатынына таңдау құқығы беріледі.
Алексей Савченко сондай-ақ, базаның жалға алынатынын, онда абоненттік және өндірістік бөлімдер, машиналарға арналған үй-жайлар барын айтты. Компанияның Талдықорған қаласы бойынша филиалының басшысы Бауыржан Қасымханның сөзінше, пәтерлер мен онда тұратын тұрғындар саны бойынша база жаңартылған. Бұл іске «Тұрғын үй қызметінің» басшысы Марлен Қалықов көмек қолын созыпты. Сондай-ақ, олар «Биллинг» компаниясымен шарт жасасып, шот алу, түбіртек тарату, төлем алу жұмыстарымен айналысатын болады.
Айгүл БАЙБОСЫНОВА
