Талдықорғанда тұңғыш рет «Aula fit» жобасы ұйымдастырылды. Бір мезетте барлық баланың түрлі спортпен айналысуына мүмкіндік берген шара – аулада доп қуып, қол күрестіріп, теннис, шахмат, дойбы ойнап жүрген балалар үшін үлкен мүмкіндік. Спорттық шараның ашылуында қала әкімі Ернат Бәзіл қатысты.
– Қаламыздағы тұрғындар үлкен-кішісіне қарамай келіп, осындай спорттық іс-шарамызды қолдап жатқанына алғыс білдіремін. Дәл осындай жобалар салауатты өмір салтын ұстанып, спортпен жүйелі түрде айналысуға шақырады. Дені сау ұрпақ – ұлт келешегі. Бүгінде ел аузында жүрген көптеген кәсіби спортшылар алғашқы ойынын дәл осындай аулада бастап, дәл осындай жерде ойнаған. Біздіңде арамыздан ел намысын қорғайтын абыройлы ұл-қыздардың шығатынына кәміл сенімдімін,– деді өз сөзінде Ернат Дүйсенбекұлы.
Жетісуда алғаш болған «Aula Fit» жобасы Мүшелтой шағын ауданынында өтті. Шара аясында көңілді эстафета, футбол, үстел теннисі, тоғызқұмалақ, дойбы және белтемірге тартылу сияқты спорт түрлері қамтылды. Одан бөлек қалалық полиция басқармасының, төтенше жағдайлар басқармасының және денсаулық сақтау саласының қызметкерлері жазғы демалыс кезінде балалардың жолда жүру және көл-тоғандарда суға түсу кезіндегі қауіпсіздік ережелерін қатаң сақтауын ескертіп, түсіндірме жұмыстарын жүргізді.
«Жетісу» футзал клубының ойыншысы Мади Саматұлы мен Жалғас Союз балаларға шеберлік сабағын өтіп, әр баланың биікті бағындыруына тілекші екендіктерін жеткізді.
Айта кетейік, қалалық спорт бөлімі биыл «Aula fit» жобасы аясында жалпы 100-ге жуық аулада спорттық шара өткізуді жоспарлап отыр.
