Алакөл өңіріндегі 95376 қойдың 51941-і төлдеуге тиіс саулық. Бүгінде оның мыңнан астамы төлдеп, қозы алынды. Мал төлдету маусымындағы түрлі қиындықты болдырмау үшін жан-жақты әзірлік жасалған. Аудандық ауылшаруашылығы бөлімінің ақпараты бойынша, осы мақсатқа 183,3 тонна шөп, 47,2 тонна жем, 25,1 тонна сүрлем, 56,7 тонна сабан және 14,2 тонна пішендеме дайындалған.
«Мал баққанға бітеді» дегендей, Алакөлде мал шаруашылығымен тұрақты айналысатын 317 шаруа қожалығы бар. Оның ішінде ИАС бағдарламасына 101 шаруа қожалығы қатысуда. Алакөлде төрт түліктің бәрі өседі. Кейінгі жылдары жылқы, ірі қара малын өсіретін шаруашылықтардың саны артып, мал бордақылаумен айналысатындардың қатары көбейген.
Деректерге сүйенсек, аудандағы мал бордақылаумен айналысатын «Акимбеков», «Жазылбеков и К», «Айманбетов», «Ұшқын», «Қайыңды», «Ақсұңқар» және тағы да басқа шаруа қожалықтары мен жеке кәсіпкерліктердің мал бордақылау алаңының жалпы қуаттылығы 6 мың бастан артық. Оның денін жылқы мен ірі қара малы құрайды. Қазірдің өзінде мал бордақылау алаңдарында 3 мың басқа жуық мал тұр.
Мал семірту алаңдарының саны мен қуаттылығы артқан сайын жылқы мен ірі қара өсіретін шаруашылықтардың да жұмысы қыза түскен. Осы жолы біз Жайпақ ауылындағы жылқы өсіріп, ірі қара бағып отырған «Сейіл» шаруа қожалығына арнайы бардық. Бізді қолында бар техникасын көктемгі дала жұмысына дайындап жатқан шаруашылық жетекшісі Бақытжан Қабдолдаев қарсы алды.
– 125 бас жылқы, 150-ден астам ірі қара малым бар. Қазір бие құлындап, сиыр төлдеп жатыр. 50-60 бұзау алдық. Қар қалың түскенімен жылқыға жайлы болды. Құлын тастаған бие, көтерем сиыр шыққан жоқ. Жылқы да, ірі қара да қоңды. Малды жазда Тоқжайлауға жайып, қыста қыстауда қолда ұстаймыз, – дейді «Сейіл» шаруа қожалығының жетекшісі Бақытжан Сәтмұхамбетұлы.
Аталған шаруашылық мал өсірумен қатар егін шаруашылығымен де айналысады. Меншігінде 150 гектардан артық суармалы жері бар. Оған негізінен жоңышқа себеді. Сонымен қатар, соя, бидай, басқа да дақылдар өсіреді. Биылдан бастап қант қызылшасын себуді қолға алмаққа ниетті. Осы жерден шауып, жинап алатын арпа, жоңышқаны жылқы мен ірі қараның қысқы азығына жұмсайды.
Шаруашылықтың техникасы толық. Биыл қосымша техника сатып алған. Оны өзі жүргізеді, жөндейді. Қолында жылқышысы, сиыршысы бар. Уақыты болғанда ат баптап, ит жүгіртеді.
Қажырлы азамат алдағы уақытта жылқы, сиырдың өнімін қосымша кәсіп көзіне айналдырудың қамында жүр.
Қ. ОМАРАҚЫН
Жайпақ ауылы,
Алакөл ауданы
