Жетісу облысының прокурорлары вакцинация туралы заңнаманың бұзылғанын анықтады. Бұл туралы облыстық прокуратураның баспасөз қызметі мәлім етті.
Облыстың денсаулық сақтау саласындағы прокурорлары бюджет қаражатының тиімсіз жұмсалғанын әрі вакцинация туралы заңнаманың бұзылғанын сондай-ақ жалған вакцинация сатып алу фактілерін анықтаған.
«Денсаулық сақтау саласындағы жауапты лауазымды тұлғалардың кінәсінен қажетті вакциналар уақтылы сатып алынбаған, нәтижесінде бір жылға дейін 7 мыңнан астам бала полиомиелитке қарсы егілмеген» — делінген хабарламада.
Бұдан өзге «А гепатитіне» қарсы препараттың артық мөлшеріне қарамастан, 2023 жылы 135 млн теңгеден астам сомаға қосымша 35 мың вакцина сатып алынған.
Заң бойынша вакцинаны сақтау мерзімі 6 айдан аспауы керек.
Қадағалау актісіне сай, облыстың Денсаулық сақтау басқармасы бастығының орынбасарын қоса алғанда, 11 лауазымды тұлға тәртіптік жауапкершілікке тартылды. 126 тұлға жалпы сомасы 8,5 млн теңгеге әкімшілік жауапкершілікке тартылды.
Фото: kamgov.ru
