Талдықорған қаласында газтурбиналық стансы салу жоспарланып отыр. Стансы жеке инвестордың есебінен салынбақ. Оған 37 млрд. теңге көлемінде қаражат жұмсалады деп көзделуде. Жоба электр және жылу энергиясын өндіруді ұлғайту мақсатында іске асырылады.
Осыған байланысты облыс әкімінің орынбасары Әсет Қанағатов сала мамандарымен жиын өткізіп, аталған мәселені бүге-шігесіне дейін талқылады. Алдымен «Басқуат Энерго» ЖШС директоры Арман Отарбаевқа сөз беріліп, жоба жайында кеңінен әңгімеленді. Серіктестік басшысының айтуынша, жоба үш кезеңнен тұрады және ол 2024-2025 жылдары жүзеге асырылады. Оны іске асыруда жалпы көлемі 80 МВт электр, 100 Гкал жылу энергиясын өндіру көзделген. Жоба келесі жылдың қазан айына дейін толық аяқталады деп күтіліп отыр. Бұл өз кезегінде Талдықорған қаласын жылу энергиясымен қамтып отырған «Басқуат» бас қазандығының қуатын арттыруға зор ықпалын тигізбек.
– Құрылысқа қажет жер учаскесі бар. Қазіргі кезде геологиялық-геодезиялық жұмыстар жүргізіліп жатыр. Зерттеу жұмыстары аяқталған соң наурыз айының басында бірінші кезеңнің құрылысын бастау көзделіп отыр. Ал мамыр-қазан айларында жобаның алғашқы кезеңі аяқталуы тиіс. Маусым-қазан айларында екінші кезеңнің құрылысын да қоса жүргізу ойда бар. Сөйтіп, алдағы қысқы жылыту кезеңіне үлгеріп, бастапқы меже – 25 Гкал жылу энергиясын өндіруге бар күш-жігерді жұмсамақпыз, – дейді Арман Отарбаев.
«Басқуат Энерго» ЖШС жаңа нысан салу кезінде 3 газ-поршенді турбина, 2 газ турбинасын, 4 кәдеге жаратушы қазандық орнатпақ.
Жиын барысында Әсет Серікұлы елімізде, соның ішінде Жетісу аймағындағы экономиканың елеулі дамуының нәтижесінде электр мен жылу энергиясына деген қажеттіліктің өсіп келе жатқанын атап өтті. Соған байланысты «Басқуат Энерго» ЖШС ұсынған бұл маңызды жоба облыс әкімдігі тарапынан қолдау тапқан.
Талдықорған қаласы әкімінің орынбасары Қуаныш Сейтімбетовтың айтуынша, осы жобаны іске асыруға байланысты әкімдікте бірнеше отырыс өткізіліп, нәтижесінде құрылысқа қажет жер учаскесінің нысаналы мақсатын өзгерту мәселесі оң шешіліп, «Басқуат Энерго» ЖШС мен «Басқуат» бас қазандығы арасында бірлескен жұмыс туралы келісімдер жасалған.
Бұдан басқа, облыстық энергетика және тұрғын үй-коммуналдық шаруашылығы басқармасының басшысы Айдос Бекетаев «Талдықорған» АГТС-ке жаңғырту жұмыстарын жүргізуді ұсынды. Өйткені, «Басқуат Энерго» ЖШС жобасын, сондай-ақ, Текелі қаласы мен Ескелді ауданының табиғи газға қажеттілігін тиісті көлемде қамтамасыз ету мақсатында осы АГТС қуатын сағатына 200 000 нм3-ке дейін жеткізу қажеттігі туындайтыны сөз етілді.
Айта кетейік, жалпы экономиканың, соның ішінде өндіріс пен құрылыс сияқты негізгі салалардың қарқынды өсуіне байланысты энергияға деген сұраныстың артуы, энергетика нысандарындағы жабдықтардың тозуы, резервтік сыйымдылық қорының шектеулілігі бұл салаға едәуір көлемде инвестиция салуды қажет етіп отырғандықтан газтурбиналық стансы салу жобасының Жетісу аймағы үшін маңызы зор болмақ.
Гүлжан ТҰРСЫН
