Талдықорған қаласының шетінде 2,5 мыңнан астам тұрғын үй орталық газбен қамтылған. Шаһар басшылығының айтуынша, облыс орталығын газдандыру 2025 жылға дейін толық аяқталмақ.
Орталық газбен қамту «Ынтымақ» ықшам ауданының тұрғындары үшін үлкен қуаныш болды. Жеке меншік үйлерде 10 мың адам тұрады. Енді олардың баспаналары көгілдір отынмен жылытылады. Әсіресе, үй иелерінің қуанышында шек жоқ. Өйткені, енді ас үй плиталары да газбен жұмыс істейді.
Талдықорған қаласы әкімінің орынбасары Қуаныш Сейтімбетовтың сөзінше, Өтенай ауылдық округі, Мойнақ ауылында 23,9 шақырымда жұмыс жалғасады. Биылғы үшінші тоқсанда да іске қосылады. Бұдан басқа, қазір жеті саяжай массиві бойынша жобалық-сметалық құжаттама әзірленуде. Атап айтқанда, Алмалы, Ащыбұлақ, Мерекелік, Сарыбұлақ, Қызыл тас, Балықты, Қаратау және бірінші бөлімше. Жалпы алғанда, бұл жұмыстар аяқталып, келесі жылы қаланы 100 пайыз газбен қамту жоспарлануда.
Соңғы кездері шеткі шағын аудандар газ құбырына белсенді қосылуда. Күзде орталық газбен жабдықтауға «Үйтас» саяжай алабы қосылды. Осы алаптың тұрғыны Райхан Бақберова да өз қуанышымен бөлісіп, бүгінде саяжайлардың жаңа кейіпте өзгере түскенін, соңғы жылдары газ бен ауыз судың беріле бастағанын және жолдар жөнделіп, тұрғындарға ыңғайлы жағдай жасалуда екенін әңгімеледі.
Бүгінде Талдықорған 90 пайызға көгілдір отынмен қамтамасыз етілген болса, облыс бойынша бұл көрсеткіш 44 пайыздан аспайды. Соңғы жылдары 300-ге жуық адам тұратын 26 ауылға табиғи газ тартылды. Өңірде газдандыру бойынша 20 жоба жүзеге асырылуда. Бұл үшін бюджеттен 8 млрд.-тан астам теңге бөлінді. Жалпы, жергілікті билік таяу жылдары өңірдің кем дегенде 65 пайызын газбен қамтамасыз етуді көздеп отыр.
Айгүл Байжұмақызы
Талдықорған қаласы
Фото: orda.kz
