2024 жыл – ұлу жылы. Шығыс күнтізбесі бойынша ең жайлы белгі саналады. Ол аңыз әпсанада бойында алып күші бар жалғыз тіршілік иесі делінеді. Қазақы дүниетанымда ұлу – жыл санау есебіне кірген тіршілік иесі. Ұлу жылы дүниеге келген бала береке мен ынтымақтың бастауына сеп болады деген наным-сенім бар. Ұлу жаңбыр мен желді басқарып, егіннің бітік шығуына әсер етіп, әлемде бейбітшілік орнатып, қоғамның өркендеп дамуына септігін тигізе алады. Бұл жылы құрғақшылық болмайды деген түсінік қалыптасқан. Жыл негізінен тыныштықпен, береке-молшылықпен өтеді. Түркі жұрты, оның ішінде қазақтар да ұлу жылы астық, шөп мол болады деп жорамалдайды. Astrosage астрологиялық басылымының деректеріне сәйкес ағаш белгісінде келетін ол адамдарға өсім, табыс, даму мен көркеюді алып келетін көрінеді. Жаңа жылдың басты түсі – жасыл. Сонымен бірге алтын, күміс, көк теңіз түсті түстер мен ақ және қызыл түс жайлы болады.
Жыл қайыру
Қазақта жыл қайыру, яғни санау он екі жылдан тұрады. Он екі жылды ата-бабамыз бір мүшел деп білген. Бір мүшелдің жылдары он екі түрлі аң мен жануардың атымен аталған. Әрбір жануардың жылы наурызда кіреді. Әр мүшел аяқталып, екіншісі басталғанда он үшінші жыл тағы да тышқаннан саналып, есеп қайта ашылады. Ұлу жылындағы жандарды орасан зор мүмкіндіктер, жаңа дамулар күтіп тұр. Оған қоса табысты көбейтуге қолайлы жыл. Жаңа жыл басталысымен өміріңізде ерекше жағдайлар орын алады. Бірақ жыл басталмай жатып нақты жоспарлар құрып алыңыз. Осылайша биік белестерді бағындыратын боласыз. Ұлу жылындағыларды барлық салада жақсылық күтуде. Тек сеніміңіз мықты болуы керек. Ескере кететін жайт, өзіңізді көп шаршатпаңыз. Өмірде ешкіммен ұрыспай, белсенді позицияны ұстану, үнемі әрекет етіп жүру ойлағаныңызды жүзеге асыруға жол ашып береді. Бұрын көрмеген жерлерге барып, саяхат жасау сізге шабыт сыйлайды. Егер ондай мүмкіндіктер болса, өзіңізді еш шектемеген дұрыс.
Ұлу жылының ерекшелігі
Ұлу жылы өте жайлы, жұмсақ жыл болып есептеледі. Стихиялық белгісі – ағаш. Бейбіт өмірді сүйетін, жайлы, тыныштықты жаны қалайтын ақылды да зерек адамдар осы жылы туады деседі. Ұлу жылының бір ерекшелігі – ол барлық уақытта кібісе жылдармен тура келеді. Кібісе жыл 366 күнге жалғасады. Табыс пен сәттілік, билік пен көшбасшылық, жомарттық пен ар-намыс, ақыл мен даналық ұғымдары жылдың басты сипаттамасы.
Ұлулар туралы қызықты деректер
• қолайсыз жағдай кезінде 6 айлық ұйқыға кете алады;
• бір минуттың ішінде 7 сантиметр қашықтықты жүріп өтеді;
• ұрпақ қалдыру үшін серіктес қажет емес;
• өз салмағынан 10 есе ауыр затты тасымалдай алады;
• ұлудың етіндегі ақуыз мөлшері тауықтың жұмыртқасынан да көп;
• ең үлкен түрі – австралиялық ұлу. Салмағы – 40 келі, ұзындығы – 30 см-ге дейін жетеді.
Ұлу жылы туған ұлы тұлғалар
Ұлу жылы туған тұлғалардан ең әуелі энциклопедист-ғалым Жүсіп Баласағұн (1016), ғұлама Әнет баба (1628), Қарасай батыр (1664), Шал ақын (1748), күрестің бірнеше түрінен әлем чемпионы атанған тұңғыш қазақ алыбы Қажы Мұқан Мұңайтпасұлы (1871), күйші Дәулеткерей Шығайұлы (1820), күйші Абыл (1820), қазақтың алғашқы режиссері Жұмат Шанин (1892), археолог-ғалым Әлкей Марғұлан (1904) бар. Осы жылы туған саясаткерлер арасында Нұрсұлтан Назарбаев та (1940) бар. Белгілі сазгер Ескендір Хасанғалиев те ұлу жылында дүние есігін ашқан еді.
Бұл тізімді шығыстың шайқы шайыры Омар Хайям (1048) бастаса, атақты жазушы, детектив жанрының негізін қалаушы Эдгар По (1810), әйгілі қаламгерлер Льюис Кэрролл (1832), Дж.Р. Толкиен (1892), Иосиф Бродский (1940), Максим Горький (1868) де ұлу жылы туған ұлылар қатарынан. Саясатқа қатысы барлардың арасында өжет қыз Жанна д’Арк (1412), орыс патшасы Николай II Романов (1868), Америка Президенті Авраам Линкольн (1810), Эрнесто Че Гевара (1928), Ресей Президенті Владимир Путин (1952), Франсуа Миттеран (1916), Эдуард Шеварднадзелерді (1928) атауға болады.
Дайындаған Еңлік Бауыржанқызы
Фото: https://www.instagram.com/erkinshilikmadeniet/
