Облыстық мәслихаттың денсаулық сақтау, білім, халықты әлеуметтік қорғау, мәдениет, қоғамдық даму және спорт мәселелері бойынша тұрақты комиссиясының отырысына облыстық мәслихаттың төрағасы Гүлнар Тойлыбаева, тұрақты комиссия мүшелері қатысты. Комиссия отырысын облыстық мәслихаттың депутаты Қуат Баймырзаев жүргізді.
Күн тәртібінде 1 мәселе қаралды. Соған байланысты облыстық қоғамдық даму басқармасының басшысы Айдар Башбаев атқарылған жұмыстар туралы баяндама жасады.
Облыста қоғамдық-саяси ахуалдың тұрақтылығын қамтамасыз ету, ақпараттық саясат, дін, этносаралық қатынастарды дамыту, азаматтық қоғаммен өзара іс-қимыл және жастарды қолдау бағытында атқарылған жұмыс ауқымды. Облыстық қоғамдық даму басқармасының басшысы Айдар Башбаев 2023 жылға арналған басқарманың жалпы бюджеті 3,2 миллиард теңгені құрағанын айтты.
– Өңірде қоғамдық-саяси тұрақтылықты сақтауға, әлеуметтік шиеленіс ошақтарын анықтауға бағытталған жүйелі жұмыстар жүргізілуде. Құқық қорғау органдарымен бірлесіп, келісілмеген митингтер мен наразылық акциялардың алдын алу шаралары қабылдануда. Облыс полиэтникалық аймақтың бірі болғандықтан этносаралық қатынастар мәселелері тұрақты және ерекше бақылауда. Барлық аудан бойынша этникалық шиеленіс картасы жаңартылды. Қазақстан халқы Ассамблеясының өкілдерін, қоғамдық пікір көшбасшыларын, жастар ұйымдарын, ақсақалдарды, діни қызметкерлер өкілдерін жұмылдыра отырып, ақпараттық-түсіндіру жұмыстары жүргізілуде. Облыс аумағында 121 ақсақалдар кеңесі құрылған. Оның ішінде 1 облыстық, 1 қалалық, 8 аудандық, 111 ауылдық округтік. Облыс бойынша 124 аналар кеңесі бар. Құрамында 590 адам жұмыс істейді. Сонымен қатар, тараптарды татуластыруда жақсы нәтиже беріп келе жатқан 105 қоғамдық медиаторлар тіркелген. Бұл жұмыстар жүйелі жүргізіліп келеді. Нәтижесін жауапты мамандар тексеріп, бақылау жүргізіп отырады, – деді Айдар Қарбозұлы.
Баяндамашының айтуынша, өңірдегі 11 конфессияға тиесілі 258 діни бірлестік пен олардың филиалдары өз қызметін жүзеге асыруда. Облыста 257 діни ғимараттар бар. Дін ғимаратындағы жауапты мамандар айтатын үгін-насихат, уағыз, жұмысының барлығы жіті қадағалауға алынған.
Әлеуметтік мәселелерді шешуде және азаматтық бастамаларды жандандыруда мемлекеттің сенімді серіктесіне айналған үкіметтік емес ұйымдармен бірлесе мемлекеттік әлеуметтік тапсырыс және гранттық қаржыландыру шеңберінде бірлескен әлеуметтік жобаларды іске асыруда облыста жүйелі жұмыс жүргізілуде.
– Облыста 14 пен 35 жасқа дейінгі жастар саны – 187 мың 942. Оның 83 мың 271-і қалалық жерде тұрса, 104 мың 671-і ауылда. 2023 жылдың ІIІ тоқсандағы мәлімет бойынша 15-28 жас аралығындағы NEET санатындағы жастардың үлесі 7,5%-ды құрайды Бұл көрсеткіш республика бойынша 7,1%-ды көрсетуде. 2022 жылдың қорытындысымен жастардың жұмыссыздық деңгейі 4,3%-ды құраса, биылғы ІIІ тоқсандағы мәлімет бойынша 3,1%. Жастар саясатын жүзеге асыру үшін 2023 жылы жергілікті бюджеттен 525,1 миллион теңге бөлінген. Сондай-ақ, «Әдеп-құқық жұмысы жөніндегі ментор» жобалық кеңсесі Талдықорған қаласында пилоттық режимде 1 қыркүйектен басталып, жобалық офис жасақталып, қаланың 30 мектебіне менторлар бекітілді. Аталған жобаға жергілікті бюджеттен 113 000 000 теңге бөлінді. Қыркүйек айынан бастап 229 іс-шара ұйымдастырылды, – деген басқарма басшысы аталған жоба алдағы уақытта аудан, ауыл мектептерінде өз жалғасын табатынын айтты. Сонымен қатар, 2023 жылы мемлекеттік ақпараттық тапсырысқа жергілікті бюджеттен 1 миллиард 222 миллион 688 мың теңге бөлінді. 2023 жылдың өткен 10 айында республикалық БАҚ-та Жетісу облысы туралы жалпы саны 13 мыңға жуық материал жарияланғанын тілге тиек етті.
Комиссия отырысында Айдар Қарбозұлының есепті баяндамасына қатысты сұрақтар қойылды. Депутаттар «Әдеп-құқық жұмысы жөніндегі ментор» жобалық кеңсесінің жұмысын барынша жан-жақты дамыту керектігін алға тартты. Жақында құрылған «Әкелер кеңесі» ҮЕҰ-ның жұмысына барынша қолдау білдіріп, алдағы уақытта қоғамдағы әке рөлін арттыруға барынша еңбек ету керектігі баса айтылды. Көтерілген мәселе депутаттардың тарапынан жан-жақты қаралып, тиісті шешім қабылданды.
Еңлік КЕНЕБАЙ
