«Үшарал-Достық» республикалық маңызы бар автокөлік тас жолын реконструкциялаудың жалпы ұзындығы 184 шақырымды құрайды. Жоба құны 61,2 миллиард теңге.
Автокөлік жолының алғашқы 87 шақырымы 2020-2022 жылдары пайдалануға берілді. Ал биылғы қазан айында «АБК-Автодор НС» ЖШС бас мердігері Көктұма ауылынан Жалаңашкөл көліне дейін ұзындығы 30 шақырым болатын тағы бір учаскені пайдалануға берді. Жоба бойынша 43 су өткізгіш құбыр төселіп, Ырғайты мен Тоқты өзендері арқылы 2 жаңа көпір салынды. Барлық жұмыс уақытылы бітті.
Жалаңашкөл қаласынан «Достық» стансысына дейінгі (120-180 шақырым) қалған учаскеде жабынның төменгі қабатын төсеу жұмысы бүгінде 100 пайызға аяқталды. Сондай-ақ, 2 көпір мен көлік айырбасы салынды, 62 су өткізгіш құбыр төселді. Жабынның соңғы жоғарғы қабаты төселді. Қозғалыс бүкіл учаскеде ашық.
Қазіргі кезде қардан қорғау қоршауларын, бағдаршамдарды, сыртқы жарықтандыруды, санитарлық-гигиеналық тораптар мен павильондарды орнату, белгілеу, сондай-ақ көпірлердің еңістерін, баспалдақтар мен су бұру құрылыстарын нығайту жұмысы жүруде. Нысанды осы желтоқсанда пайдалануға беру жоспарлануа.
Айта кетейік, жаңартылған жолға еуропалық сапалы қиыршық тасты-мастикалық асфальтбетон төселген. Ол жоғары беріктікке ие және ауыр салмақты жүк көліктеріне жарамды.
Айгүл Байжұмақызы
