Премьер-министр Әлихан Смайылов Мәжілістің жалпы отырысының кулуарында қаза тапқан кеншілердің отбасынан кешірім сұрады.
Бұндай жаңалықты AstanaTV таратты деп хабарлайды 7-su.kz желілік басылымы.
«Кінәлі тұлғаларға келетін болсақ, қазір сәйкес жұмыстар жүргізіліп жатыр. Былтыр да 4 кенші қаза тапты. Ол бойынша барлық тергеу аяқталды. Жақын арада материалдар сотқа беріледі. Тамыз айында апат болып, 5 кенші қаза тапты. Қазір тергеу жұмыстары жүргізіліп жатыр. Соңғы болған апат бойынша да тергеу басталды. Барлық кінәлі тұлғалар жазаға тартылады. Шенеуніктерге келетін болсақ, олар да тергеу аясында болады. Біз Үкімет ретінде бұл трагедиялардағы кінәмізді түсінеміз. Қаза тапқан кеншілердің отбасы мен зардап шеккендерге өзім және әріптестерімнің атынан кешірім сұрағым келеді. Біз де болған оқиға үшін жауаптымыз. Қазіргі біздің мақсатымыз-компанияны Қазақстанға қайтарып, оның тұрақты жұмысын қатмамасыз ету және жұмыс орындары мен жалақыны сақтап қалу. Кеншілердің қазасынан кейін туындаған міндеттерді де орындауымыз керек», — деді Смайылов.
Премьер-министр «АрселорМиттал Теміртау» компаниясының қазіргі жағдайына да ішінара Үкімет жауапты екенін айтты.
«Инвестордың өзінің міндеттемелерін орындамауы біздің де жауапкершілігімізге жатады. Сондықтан кеншілердің отбасынан кешірім сұраймыз, өз жауапкершілігімізді сезінеміз», — деді Үкімет басшысы.
Еске салсақ, «Костенко» шахтасында апат болып, 46 кенші қаза тапты.
Фото: Үкімет сайты
