Бірлігі мен берекесі жарасқан Көксу ауданындағы алақандай ғана Жарлыөзек ауылында 30 бала ойнайтын балалар алаңы ашылды. Ауылдастардың қуанышты сәтіне аудан басшысы Марлен Қапашұлы арнайы барып, балалар спорт алаңының лентасын салтанатты түрде қиды. Ауылдың ақ жаулықты әжелері шашу шашып, өнерпаздар ән жырын арнады.
– Бала – болашағымыз. «Жерде бір бала қуанса, көкте мың періште шаттанады» деген қазақтың сөзі текке айтылмаған. Бұл қуаныш – балалардың қуанышы. Енді балалар бос уақытында осы алаңға келіп, ойын ойнап, спортпен айналысады. Уақыттарын тиімді өткізеді, – деген аудан басшысы балаларға тегін доп таратып, халық игілігіне берілген жаңа нысанды орнатқан жауапты мамандарға алғыс білдірді.
Мердігер «АТС Build» ЖШС салған ойын алаңының құрылыс жұмысына 18 миллион 480 мың теңге жұмсалған. Соңғы үлгідегі жабдықтармен қамтамасыз етілген алаңда балалар доп теуіп, әткеншек ойнап, турникке тартылып, бұқаралық спортпен де шұғылдана алады.
Дәл осындай нысан Мұсабек ауылдық округіне қарасты Мәулембай ауылында да ашылды.
Аудан әкімі Марлен Көлбаев Мәулімбай ауылының тұрғындарын құттықтап, ақ тілегін айтса, ауыл азаматы «Кең дала» шаруа қожалығының басшысы, аудандық мәслихат депутаты Қалибек Алпысбаев Президент тапсырмасын кезең кезеңімен іске асырып жатқан облыс, аудан әкімдеріне ауыл азаматтары атынан алғыс білдірді.
Бұл жолы жаңа нысанның лентасын қию ауыл балаларына бұйырды. Қуаныштан көздері бал-бұл жанған балаларға ел ағалары тегін ойыншықтар таратып, қуаныштарын еселеді.
Ойын алаңының құрылысын жеке кәсіпкер «Кенженова» небәрі 4 айдың ішінде аяқтаған. Құрылысқа 22 миллион 499 мың теңге қаржы бөлінген.
Еңлік Кенебай
