Бүгін Республика күніне орай Жетісу өңірінде «Жаңа Қазақстан. Таза табиғат» аясында республикалық сенбілік өтті. Акцияға облыс әкімі Бейбіт Исабаев қатысып, көпшілікпен бірге тазалық жүргізу, ағаш отырғызу сынды иігілікті іске өз үлесін қосты.
Экоеріктілер, мемлекеттік, бюджеттік және жеке мекемелердің ұжымдары, көппәтерлі тұрғын үйлерді басқару органдары, жеке сектор үй иелері саябақ, сквер, су айдыны, бұлақ, жеке және көппәтерлі тұрғын үйлердің аумақтарын, көшелерді, тротуарлар мен арықтарды тазартты.
– Келесі аптадан бастап ауа райы бұзылады. Қыс келе жатыр. Табиғат ананың өзі тазаланып тұрғанды жақсы көреді. Қоғам, билік қалай тазарса, табиғат анамызды да тазартқан дұрыс болады. Сондықтан облыс бойынша барлық аудандарда бүгін сенбілік өтіп жатыр. Мына коттеджді қалашықты білесіздер. Біраз сөз болған. Ағаш егеді, бірақ суару жүйесі болмағанан кейін өліп қалады. Жаңадан келген қаланың әкіміне тапсырып, суару жүйесін жасадық, енді ағаш ектік. Көктемнен бастап қосылады. Ендігі кезекте орындық, брюшаткаларын, жасаймыз. Бітпей қалған үйлерді салып, қолданысқа береміз, – деген Бебіт Өксікбайұлы барлық тұрғындарды сенбілікке белсенді қатысуға шақырды.
Бүгінгі акцияға 27 742 адам қатысып, 1120 шақырым автомобиль жолдары, 400 шақырым арық желілері тазартылды. Жалпы 312 бірлік арнайы техника тартылып, 2002 тонна қоқыс шығарылды. Сондай-ақ, 6456 көшет отырғызылды. Сенбіліктің барлық қатысушылары қажетті құрал-жабдықтармен қамтамасыз етілді.
Мәулен Әнербай
Суретті түсірген Жеңіс Ысқабай
