Алакөл ауданына жұмыс сапарымен барған облыс әкімі Бейбіт ИСАБАЕВ өңірдің тыныс-тіршілігімен танысып, тұрғындарды жеке мәселелері бойынша қабылдады. Артынша халықпен кездесіп, елдің әлеуметтік жағдайын жақсарту бағытында атқарылып жатқан шаруаларды толықтай баяндады. Сонымен қатар, аудан жұртшылығын толғандырған сауалдарға жауап берді.
Ауданда автомобиль жолдарын жаңартып салу жөндеу, жаңғырту жұмыстары қадағаланып отырғанын жеткізген облыс әкімі Бейбіт Исабаев тұрғын үймен қамтамасыз ету мәселесі де өзекті болып отырғанына тоқталды. Әкімнің айтуынша, ауданда 1591 адам үйдің кезегінде тұр. Оның ішінде әлеуметттік осал топтарға кіретін 657 адам бар. Биыл пайдалануға беру жоспарланып отырған 23,1 мың шаршы метр тұрғын үйдің 7,2 мың шаршы метрі бюджет есебінен салынуда. Биыл қаңтар айында Үшарал қаласында 40 пәтер берілсе, алдағы қараша айында тағы 60 пәтерлік үйдің құрылысы аяқталады. Одан бөлек, 62 пәтерді сатып алу үшін республикалық бюджеттен 592,2 миллион теңге бөлініп отыр. Бұл қаржыға жыл соңына дейін пәтерлер сатып алынады. Жеке инвестор ретінде «Қайнар АКБ» ЖШС келесі жылы 60 пәтерлік екі тұрғын үйді пайдалануға беруді көздеп отыр. Ал биыл жыл соңына дейін 162 пәтер кезекте тұрған мұқтаж азаматтарға берілмек.
Ауданның білім, денсаулық, спорт, әлеуметтік қамсыздандыру салаларындағы өзекті мәселелерге тоқталған Бейбіт Өксікбайұлы әр салаға жауапты орынбасарларына аудан әкімімен және облыстық білім, денсаулық сақтау, спорт және дене шынықтыру басқармаларымен бірлесіп, күрмеуі қиын тақырыптарды шешу үшін нақты шаралар қабылдауды, кемшіліктерді жоюды тапсырды.
Сондай-ақ, биыл ақпан айындағы кездесуде аудан тұрғындары көтерген өзекті мәселелер бойынша атқарылған шараларға тоқталған облыс әкімі бүгінде 13 сұрақтың 7-і шешімін тапқанын, 6 мәселе бойынша жұмыстар жалғасып жатқанын атап өтті.
Халықпен кездесуден кейін аймақ басшысы бірқатар нысандарды аралады. Бейбіт Өксікбайұлы әуелі ат басын құрылысы жаңа аяқталған Бескөл ауылындағы 80 орынды дене шынықтырусауықтыру кешеніне бұрды. Жалпы құны 1 млрд. теңге салынған кешеннің құрылысы толықтай аяқталыпты. Мұнда спорттың 4 түрінен (қазақ күресі, дзюдо, бокс, волейбол) жаттығу жүргізілуде. Спорт сарайының ішінде күрес, бокс, үлкен ойын залы және жаттығу залы бар. Заман талабына сай спорт кешенін толықтай аралап шыққан Бейбіт Өксікбайұлы болашақта шалғай ауылдарға осындай нысандар салу жоспарда бар екенін айтты.
Сапар барысында облыстық дене шынықтыру және спорт басқармасының басшысы Ұлан Рысқұл алдағы уақытта спорт кешенінде төрт спорт түрінен бөлек шахмат, үстел теннисін ашуды көздеп отырғанын жеткізді.
Айдар ҚАЛИЕВ
