Кеген ауданының орталығындағы спорттық-сауықтыру кешенінде Тәуелсіздігіміздің 30 жылдығы аясында Кеген ауылының біртуар перзенті, қазақ күресінен 2 дүркін әлем, 3 дүркін Азия чемпионы Бауыржан Тәліптің құрметіне 2009-2010 жылғы жасөспірімдер арасында турнир өтті.
Бәсекеге Алматы, Талдықорған, Шымкент қалаларынан, Түркістан, Қызылорда облысынан және облысымыздың барлық аудандарынан жасөспірім палуандар қатысты.
Жарыстың ашылу салтанатына Кеген ауданының әкімі Талғат Байеділов қатысып, жарысқа қатысушы палуандарға сәттілік тіледі. Калың көпшіліктің алдында Бауыржан Тәліптей алтын ұлдарының омырауына «Кеген ауданының Құрметті азаматы» төсбелгісін тақты. Республикалық «Спорт жұлдыздары» журналының шеф-редакторы, Алматы, Нұр-Сұлтан қалаларындағы филиалының директоры Жандос Аянбек те лайықты құрметін көрсетті. Салтанатты сәтте Бауыржанға Кеген ауылының 1979 жылғы түлектері және «Жерұйық Кеген жастары» атынан сый-сияпат жасалды. Ауданның спортын дамытуға елеулі үлестерін қосып келе жатқан бір топ азамат аудан әкімінің Құрмет грамотасымен, Алғыс хатымен марапатталды. Салтанатты шарада Бауыржанның алғашқы ұстазы, ақын, спорт ардагері Шеризат Мекебаев қазағының жұлдызын жарқыратып жүрген Бауыржандай шәкіртіне арнау өлеңін оқыды. Тәлімгер ұстазы әрі бапкері Қапар Рауанов және Бауыржан Тәліп жарысты ұйымдастырушыларға, Кеген ауданының әкімдігіне, аудандық балалар мен жасөспірімдер спорт мектебінің ұжымына алғыстарын айтты.
Бір күнге созылған дүбірлі жарыстың қорытындысында Еңбекшіқазақ ауданының жас палуандары командалық есеп бойынша 1-орынды иеленді. Кеген ауданының жасөспірімдері 2-орыннан, Райымбек ауданының жастары 3-орыннан көрінді. Жеңімпаздарға облыстық дене шынықтыру және спорт басқармасының дипломдары, медальдары тапсырылды
Қанат БІРЖАНСАЛ
