Дүниежүзін жыл бойы мазалаған коронавирус індетінің екінші толқыны көпшілікті алаңдатып отыр. Жалпы халық сақтық шараларына ден қойғанымен ел ішінде бұған салғырттықпен қарайтындар да жоқ емес. Медицина қызметкерлерінің білімі мен білігі, өз кәсібіне адалдығы бәсекеге түскен бұл жылдың тағылымы тарихта айшықталатыны ақиқат.
Панфилов ауданының медицина қызметкерлері індеттің екінші толқынына қаншалықты дайындалғанын өңірдің бас дәрігері Төлеу Сарпековтен сұрап білдік. Бас дәрігердің мәліметі бойынша аудандық денсаулық сақтау саласында 174 дәрігер және 1060 орта буынды маман жұмыс атқарады.
Үстіміздегі жылы медицина қызметкерлерінің қатарын 10 жас дәрігер, 38 орта буынды жас маман толықтырды. Алайда, өңірде білікті мамандар әлі де жеткіліксіз, атап айтқанда, анестезиолог-реаниматолог, дерматовенеролог, акушер-гинеколог, балалар офтальмологі сияқты мамандар жетіспейді.
Мамандардың жетіспеушілігіне қарамай қатардағы кәсіпқой медицина қызметкерлері індеттің ел ішіне жайылмауының алдын алу жолында жанкештілікпен қарекет жасап келеді. Дегенмен, індетке шалдыққандар саны 337-ден асты. Жыл басынан бері өңірде 16138 адамнан сынама алынды. Күн сайын 80-100 адамға індетті анықтауға арналған сынама жасалуда.
Жыл басынан бері тікелей індетке қарсы жұмыс істеген дәрігерлер мен мейірбикелерге 76 447 009 теңге үстемеақы төленді. Қиындықта бейтарап қалмайтын жандар мен меценаттардың көмегімен аудандық аурухана қажетті құрал-жабдықтармен қамтамасыз етіліп, 32 оттегі концен-траторы қойылды. Қазіргі жағдайда 120 сырқатқа бірден дем беретін стансының орнатылуы медицина қызметкерлеріне зор көмек. Стратегиялық маңызы жоғары бұл нысанның құны 76 миллион теңге.
– Оттегі стансысының орнатылуына облыстық денсаулық сақтау басқармасы, аудандық әкімдік қолдау жасады, – дейді Панфилов аудандық көпсалалы ауруханасының бас дәрігері Төлеу Құмарбекұлы. – Енді біз аурухана бөлімдерін оттегі баллондарымен тұрақты қамтамасыз ете аламыз. Індет басталысымен біздің медицина қызметкерлері тұрғындар арасында жұқпалы кеселдердің алдын алу бағытында түсіндіру жұмыстарын пәрменді атқарып келеді. Біз қажетті дәрілерді жеткілікті мөлшерде әзірледік, жұқпалы аурулар бөлімінде 30, провизорлық орталықта 20, карантин бөлімінде 50 төсек қойылды. Жалпы ауданда 315 төсек жасақталды. Бұдан басқа орталық аурухана, ауылдық аурухана, дәрігерлік амбулаториялар мен ФАП-тар бетперде және қорғаныс киімдерімен қамтамасыз етілді. Жұқпалы індетпен күресумен қатар біз есепте тұратын созылмалы сырқаты барларды, онкологиялық дертке шалдыққандарды, күнделікті емханаға келушілерді емдеуді назардан тыс қалдырған жоқпыз.
Жақында аудандық ауруханаға облыс әкімі Амандық Баталов жаңа қондырғылармен жабдықталған 4 «Жедел жәрдем» көлігінің кілтін берді. Бұл жөнінде аудан әкімі Талғат Өмірәлиев былай дейді: «Біздің ауданда Көктал ауылында провизорлық орталық ашылып, 75 орынды бөлім дайын тұр. Аудандық орталық ауруханаға оттегі стансысын алып келіп, өңірдің бас дәрігері Төлеу Құмарбекұлымен бірге орнатып, іске қостық. Жақында аудандық аурухананың көлік тұрағы жаңа 4 «Жедел жәрдем» санитарлық автокөлігімен толықты. Оның алдында тағы 3 осындай көлік алғанбыз. Осындай жанды қарекеттер COVID-тің екінші толқынына қарсы қарекет жасауымызға үлкен қолдау болмақ».
Мырзағали НҰРСЕЙІТ
Панфилов ауданы
