Ел Президенті Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Қазақстан халқына арнаған Жолдауын Талғар ауданының жұртшылығы зор ықыласпен тыңдап, жылы қабылдады.
Жолдауда Мемлекет басшысының сайлауалды бағдарламасында белгіленген ұсыныстары мен бастамалары ары қарай жалғасатыны айтылып, қоғамның дамуы үшін атқарылуы тиіс жұмыстарға нақты бағыт-бағдар көрсетілді. Ендігі міндет – Президенттің алға қойған тапсырмаларын жүзеге асыру екендігі аудан активінің жиынында кеңінен тарқатылды.
Әрбір қазақстандық үшін зор маңызға ие бұл Жолдауды талқылауға аудандық мекеме, кәсіпорын, комитет, басқарма басшылары, бөлім жетекшілері, еңбек ардагерлері, білім беру, денсаулық сақтау саласының қызметкерлері, ауылшаруашылық құрылымдарының басшылары, қоғамдық бірлестіктер жетекшілері, аудандық-ақпараттық түсіндіру тобының мүшелері мен ауылдық округ әкімдері қатысты.
Шарада Жолдауда белгіленген тапсырмаларды іске асырудағы атқарушы органдардың міндеттері туралы Талғар ауданының әкімі Серікжан Ерекешев баяндама жасады.
— Мемлекет басшысы Елбасы тарапынан қабылданған Ұлт жоспары мен Бес институционалдық реформаны іске асыру маңыздылығы туралы атап өтті. Басты мақсат – жұмыс орындарын және халықтың табыс көзін сақтау. Осыны жүзеге асыруда Мемлекет басшысы алдымызға 11 міндет қойды, – деп баяндамасын бастаған Серікжан Қазиұлы жаңа Жолдаудың басты міндеттерін тарқатты. – Жолдаудан туындайтын нақты міндеттердің бірі – мемлекеттік басқарудың жаңа моделін қалыптастыру. Ел Президентінің тапсырмасына сәйкес, жыл соңына дейін мемлекеттік қызметкерлердің 10 пайызын, келер жылға 15 пайызын қысқару жұмыстары жүргізіледі.
Бұдан әрі Жолдауда аталған нақты міндеттер бойынша аграрлы ауданның ауылшаруашылық құрылымдары мен әлеуметтік-экономикалық дамуында атқарылуға тиіс нақты қадамдар жайын сөз етті. Сонымен қатар, Жолдауда атап айтылғандай, шағын және орта бизнестің үлес салмағын 2025 жылға дейін 35 пайызға арттыру талабын орындауға да аудан кәсіпкерлері жұмыла атсалысу қажеттігіне тоқталды.
Елдің әлеуметтік әлеуетін арттыруға бағытталған жаңа Жолдауда баса айтылған білім беру мен денсаулық сақтау саласын дамыту, сондай-ақ, аудан халқын қолжетімді тұрғын үймен қамтамасыз ету, жинақталған зейнетақы қорындағы қаржысын тиімді пайдалану сынды өзекті мәселелердің мән-жайына тоқталған аудан әкімі С.Ерекешев ел Президентінің жаңа Жолдауы қоғам дамуына жаңа серпін беретіндігін айрықша атады.
Баяндамадан соң жарыссөзге шыққан аудандық ардагерлер кеңесінің төрағасы Матан Бекбосынов, Талғар аудандық орталық ауруханасы бас дәрігерінің орынбасары Қайрат Исабаев, белорусь этномәдени бірлестігінің төрайымы Жанна Третьяк және Талғар қаласындағы №1 орта мектептің директоры Зәмзәгүл Мушрапилова Президент Жолдауының елдің әлеуметтік-экономикалық дамуына тигізер әсер-ықпалының зор екендігін ерекше атап өтті.
Ұлбосын ИСАБЕК
Талғар ауданы
Алматы облысы
