Алматы облысында есірткі өсімдіктерін үйде өсірумен айналысқан қылмыскер ұсталды. Бұл туралы Алматы облысының полиция департаменті мәлімдеді.
Күдіктінің ауласынан қарасора түріндегі 21 түп өсімдік тәркіленді. Полицейлер 57 жастағы үй иесінің құрамында есірткі бар қарасора өсімдігін өсірумен айналысқанын анықтады.
— Тыйым салынған өсімдіктерді өсіру дерегі Іле ауданы, Көкқайнар кентінің саяжайында тіркелді. «Наркотик» жедел-іздестіру іс-шарасы барысында бұрын есірткі заттарын сақтағаны және өткізгені үшін бірнеше рет сотты болған саяжай тұрғынының қарасора өсіріп, оны суарып, күтім жасайтындығы туралы ақпарат келіп түсті. Көрсетілген мекенжайға келген тәртіп сақшылары үй иесін таба алмаған, себебі, ол бау-бақша арқылы ізін суытқан. Қашып кеткен азаматтың жұбайының қатысуымен жүргізілген жер учаскесін қарау кезінде құқық қорғау органдары қарасора түріндегі өсімдіктердің 21 түбін және ерекше иісі бар өсімдік тектес ұсақталған заты бар газеттік ораманы тауып, тәркіледі, — деді Алматы облысы полиция департаменті есірткі бизнесіне қарсы іс-қимыл басқармасының бастығы, полиция полковнигі Қазбек Мұхамедов.
Аталған дерек негізінде ҚР Қылмыстық кодексінің 300-бабы, 1-бөлігі бойынша қылмыстық іс қозғалып, сотқа дейінгі тергеу амалдары шеңберінде тиісті сараптамалар тағайындалды.
— Біз түнде күдіктіні ұстадық. Ол тыйым салынған өсімдікті өзі үшін, яғни, марихуананы өндіру және пайдалану мақсатында өсіргенін жеткізді. Тергеу барысында ұсталған азаматқа қатысты «ешқайда кетпеу және тиісті мінез-құлық туралы қолхат» бұлтартпау шарасы таңдалды, — деп толықтырды Қазбек Мұхамедов.
Айта кетейік, жыл басынан бері Алматы облысында 464 қылмыстық құқықбұзушылық анықталған, оның 364-і есірткіге қатысты теріс қылық және 100-і таза есірткі қылмысы.
«ЖЕТІСУ-АҚПАРАТ»
