Тау қойнауындағы Сарытөбе ауылының ортасын бөліп, жайшылықта жылтырап, жылғаланып ағатын шағын өзен көктемде қар ерігенде, нөсерлі жауында тасып, елді мекен тұрғындарының тыныштығын алатын. Мұндай кезде ауыл тұрғындары Қоңырөлеңге немесе аудан орталығына жете алмай қалатын. Қазір бұл мәселе біржола өз шешімін тапты.
Биыл ауылдастар жиналып, қарекет жасап, қаржы жинап, оларды кәсіпкер жерлестері, дін қызметшілері мен округ әкімдігі қолдап, өзен үстінен ұзындығы 31 метр, ені бір метрден астам жаяу жүргіншілерге арналған аспалы көпір орнатты. Осындай қайырлы іс округ орталығы Қоңырөлең ауылында да қолға алынып, Көктерек өзенінің жағалауындағы Қожбанбет би және С.Сейфуллин көшелерін жалғастыратын ұзындығы 20, ені 4 метрлік көпір салынды.
Ел игілігіне арнап салынған көпірлердің пайдалануға берілу салтанаты індеттің өршуіне байланысты шағын топпен өткізілді. Оған Қазақстан мұсылмандар діни басқармасының өкілі Камалжан Тұрдыбаев, Талдықорған аймағының өкіл имамы Ардақ Оразбаев, Панфилов аудандық мешітінің имамы Серік Шәріп қатысты.
Жиынға қатысқан қонақтар ауыл азаматтарына, құрылыстың сапалы әрі жылдам орныдалуына көп көмек көрсеткен ауыл меценаты, ауылдағы ардагерлер қауымдастығының төрағасы, «Еңбек» ЖШҚ жетекшісі Д.Жұмабаевқа, құрыш қолды құрылысшылар К.Есенбаев, Г.Момбаев, Н.Досымшалов және С.Қырықбаевқа, тағы басқа құрылысқа қолғабыс көрсеткен барлық азаматқа алғыс айтты.
– Адамзат үшін елмен елді жалғайтын көпір салу қай кезде де қасиетті қарекеттер қатарына енетін іс. Жергілікті халыққа өте керек болған бұл істің көптен бері шешімі табылмай жүрген. «Көп түкірсе көл» демекші ұйымдасып, ұжымдасып, іс тындырған ауылдастарымның ауызбірлігіне тәнтімін. Ауылдастардың бауырмалдығы, ынтымағы, пейілді берекесі осындайда көрінеді екен. Әр кез бірге болып, үлкендердің ақылына жүгінген елдің алмайтын асуы болмайды, – дейді Қоңырөлең ауылдық округінің әкімі Нұрлан Әлімов.
Мырзағали НҰРСЕЙІТ
Панфилов ауданы
Алматы облысы
