Қазір білім беру жүйесі түбегейлі өзгерген. Оқыту әдістемесінің күрделілігін ұстаздар да, ата- аналар да іштей сезінеді. Қарғалы ауылындағы дарынды балаларға арналған үш тілде оқытатын №2 гимназияның бастауыш сынып мұғалімі Айнұр Натиқұлованың ұстаздық қызметте жүріп, оның ыстығына күйіп, суығына тоңып жүргеніне биыл сегізінші жыл. Жас та болса тәжірибесі мен жаңа инновациялық оқыту әдістерін терең меңгергенінің арқасында өзгелерге үлгі болып жүрген ұстаздың жеткен жетістіктері бір төбе.
Айнұр Нұрғалиқызы сабақ бағдарламасының қиындығына қарамастан оқушылармен қосымша көрмелер, ашық сабақтар ұйымдастырады, шәкірттерін республикалық білім, өнер сайыстарына дайындайды.
Республика деңгейінде өтетін білім байқауларын жіті бақылайтын ұстаз өткен оқу жылында республикалық «Дәстүрлі Интернет Олимпиада» порталынан Құрмет грамотасын, «GALYMPAZ» халықаралық бағдарламалар және білім беру орталығынан Алғыс хат, «Qaztest.kz» сайтының «Бастауыш білім беру педагогикасы» байқауынан 3-ші дәрежелі диплом, республикалық интернет олимпиадасынан 3-ші дәрежелі диплом иеленген. Сондай-ақ, Қазақстан Республикасы Педагогтар қауымдастығының «Үздік жас педагог» төсбелгісімен марапатталды. Осылайша, мамандық таңдауда жаңылыспаған жанның шығар шыңы мен абыройы биік болатынын дәлелдеді.
Ұстаздың еңбек жолына тоқталар болсақ, алғаш қызметін 2012 жылы Жамбыл ауданы Сарыбастау ауылдық орта мектебінде бастауыш сынып мұғалімі болудан бастаған. Ал 2016 жылдан бері Қарғалы ауылындағы дарынды балаларға арналған үш тілде оқытатын №2 арнаулы гимназиясында еңбек етуде.
«Ұстаздық еткен жалықпас, үйретуден балаға» деп ақын Абай жырламақшы, елеулі еңбектің арқасында құрметке бөленген Айнұрдың асар асуы әлі алда.
Майра АЛДАБЕРГЕНОВА
Жамбыл ауданы
